भिसा अवधि सकिएका दुई हजार विदेशी अलपत्र 

काठमाडौं– भिसा अवधि सकिएका २ हजार विदेशी नागरिक नेपालमा अलपत्र परेका छन्। निषेध आदेशका कारण उनीहरुको स्वदेश फर्कन नपाएका हुन्। उनीहरुमध्ये अधिकांश पर्यटक भिसामा आएका हुन्। 

भिसा अवधि थप गर्ने निकाय अध्यागमन विभाग अन्तर्राष्ट्रिय उडान ठप्प भएसँगै वैशाख २३ गतेदेखि बन्द छ। अत्यावाश्यकबाहेकका सेवा बन्द गरिएकाले भिसा अवधि सकिएकाहरुको नवीकरण गर्न नपाएको विभागका महानिर्देशक नारायणप्रसाद भट्टराईले जानकारी दिए। 

उनका अनुसार हाल भिसा अवधि सकिएकाले अब नवीकरण गर्दा निषेध आदेश अन्त्य भएको एक सातासम्म जरिवाना तिर्नुपर्ने छैन। 
महानिर्देशक भट्टराईले भने, अन्तर्राष्ट्रिय उडान सुरु हुनेबित्तिकै सबै काम सहज हुनेछ। उडान सुरु भएको एक हप्तासम्म भिसा नवीकरणमा  जरिवाना लाग्ने छैन।’ 
अमेरिकाबाहेकका विदेशी नागरिक वर्षमा १ सय ५० दिन भन्दा बढी नेपालमा बस्न पाउँदैनन्। नेपाल र अमेरिकाबीच भिसामा पारस्पारिकता कायम भएपछि अमेरिकी नागरिक भने एक पटक भिसा लिएपछि १ सय ८० दिन नेपाल बस्न पाउँछन्।