२९ वटा जिल्लामा ५०० भन्दा धेरै सक्रिय संक्रमित

काठमाडौं– पाँच सयभन्दा बढी सक्रिय संक्रमित रहेका जिल्लाको संख्या २९ पुगेको स्वास्थ्य तथा जनसंख्या मन्त्रालयले जनाएको छ। 

मन्त्रालयका अनुसार ४६ जिल्लामा २ सयभन्दा धेरै सक्रिय संक्रमित छन्। ५ सयभन्दा धेरै सक्रिय संक्रमित हुने जिल्लाहरुमा प्रदेश १ मा ३ जिल्ला मोरङ, सुनसरी र झापा छन् भने प्रदेश २ का ४ जिल्ला रौतहट, धनुषा, पर्सा, महोत्तरी, बारा छन्। 

बागमतीका ८ जिल्ला काठमाडौं, भक्तपुर, ललितपुर, चितवन, काभ्रे, मकवानपुर, धादिङ र नुवाकोटमा ५ सयभन्दा धेरै सक्रिय संक्रमित छन्। गण्डकी प्रदेशका कास्की, गोरखा, नवलपरासी पूर्व गरी ३ जिल्ला र लुम्बिनी प्रदेशमा ७ जिल्ला दाङ, बाँके, रुपन्देही, पाल्पा, बर्दिया, कपिलवस्तु, र नवलपरासी पश्चिम छन्।

कर्णाली प्रदेशको सुर्खेत र सुदूरपश्चिमका कैलाली, कञ्चनपुर र बैतडीमा ५ सयभन्दा धेरै सक्रिय संक्रमित रहेको मन्त्रालयले जनाएको छ।