संक्रमितको शव व्यवस्थापन गर्ने सेनाको टोली विराटनगरमा 

विराटनगर– कोरोना भाइरस संक्रमणका कारण मृत्यु भएकाहरुकोे शव व्यवस्थापनमा परिचालन गरिँदै आएको नेपाली सेनाको ‘बडी व्यवस्थापन’ टोलीलाई विराटनगरमा ल्याएर राखिएको छ। 

विराटनगरबाट करिब ४० मिनेटको दूरीमा रहेको मोरङको कटहरी गाउँपालिका–४ थलाहामा राखिँदै आएको टोलीलाई विराटनगर ल्याइएको हो। संक्रमितको मृत्यु भएको जानकारी पाएपछि तयार भएर आउन नै समय लाग्ने र बेलैमा शवको व्यवस्थापन गर्न गाह्रो भएर अवस्था जटिल बन्न थालेपछि टोलीलाई विराटनगर ल्याएर राखिएको नेपाली सेनाको भैरवनाथ गण थलाहाका गणपति एवं प्रमुख सेनानी गणेश रावलले जानकारी दिए। सेनाले दैनिक १० वटासम्म शवको व्यवस्थापन गरिरहेको छ। 

टोलीलाई छुट्टै आइसोलेसनसहित विराटनगरमा रहेको नेपाल रेडक्रस सोसाइटीको भवनमा राखिएको जानकारी रावलले दिए। यो टोली दुई साताका लागि मात्रै विराटनगर बस्नेछ। त्यसपछि अर्को टोलीले पालो दिएसँगै क्वारेन्टाइनमा बस्न जान्छ । संक्रमितको शव व्यवस्थापन गर्ने टोली प्रत्येक १५–१५ दिनमा परिवर्तन गरिने प्रमुख सेनाले रावलको भनाइ छ। 

शव व्यवस्थापन चाँडै गर्न सकियोस् भनेर टोलीलाई विराटनगरमै ल्याएर अलग्गै राखिएको उनले बताए। टोली विराटनगरै आएर बसेपछि संक्रमितको शव व्यवस्थापनमा भएरहेको असहज परिस्थितिको अन्त्य र समयको बचत तथा व्यवस्थापन समयमै हुने अपेक्षा गरिएको छ। शव व्यवस्थापनमा चार–चार जनाको दुईवटा टोली खटिँदै आएको छ।