चन्द्रागिरिमा जेठ १ देखि आइसोलेसन सेन्टर

काठमाडाैं - चन्द्रागिरि नगरपालिकाकाले कोभिड-१९ संक्रमितको उपचारका लागि आइसोलेसन सेन्टर सञ्चालन गर्ने भएको छ।

नगरपालिकाले आउँदो जेठ १ गतेदेखि वडा नं ८ मातातीर्थस्थित सामुदायिक अस्पतालको निर्माणाधीन भवनमा सो सेन्टर सञ्चालन गर्ने तयारी गरेको हो।

अक्सिजनसहितको ३० शय्याबाट १०० शय्याको आइसोलेसन सेन्टर बनाइने सो वडाका अध्यक्ष सन्तोष खड्काले जानकारी दिए।

नगरको सामाजिक विकास समितिका संयोजक खड्काले सो वडा कार्यालयले प्रयोग गर्दै आएको सरकारी गाडीलाई एम्बुलेन्सका रूपमा प्रयोग गर्ने पनि बताए। 

सो सेन्टरमा चिकित्सक, स्वास्थ्यकर्मीलगायतको समूहले आइसोलेसनमा २४ सै घण्टा सेवा प्रदान गर्ने र बिरामीको अवस्था हेरी आवश्यक परेमा बलम्बुस्थित सशस्त्र प्रहरीको अस्पतालमा थप उपचारका लागि समन्वय गरिएको नगरपालिकाका स्वास्थ्य शाखा प्रमुख राममणि घिमिरेले जानकारी दिए। 

नगरपालिकामा हालसम्म दुई हजार ६६३ संक्रमित भएका छन् भने २६ जनाको मृत्यु भएको छ। हाल चन्द्रागिरि नगरपालिकामा ३९० सक्रिय सङ्क्रमित छन्। रासस