गण्डकी प्रदेशको विशेष अधिवेशन अन्त्य

पोखरा– गण्डकी प्रदेश प्रमुख सीता पौडेलले प्रदेश सभाको विशेष अधिवेशन अन्त्य गरिदिएकी छिन्। मुख्यमन्त्री पृथ्वीसुव्वा गुरुङले राजीनामा दिएको भोलिपल्टै उनले विशेष अधिवेशन अन्त्य भएको पत्र प्रदेश सभा सचिवालयमा पठाएको सचिवालयका सचिव हरिराज पोखरेलले जानकारी दिए। 

मुख्यमन्त्रीले राजीनामा दिएपछि विशेष अधिवेशनको औचित्य नभएको भन्दै पौडेलले अधिवेशन अन्त्य गरिदिएकी हुन्। विशेष अधिवेशनको कार्यसूची अनुसार आज मुख्यमन्त्री पृथ्वीसुव्वा गुरुङ विरुद्धको आविश्वास प्रस्तावमा मतदान हुने थियो। 

तर मतदानअघि नै मुख्यमन्त्रीले आइतवार राजीनामा दिएका थिए। मुख्यमन्त्रीको राजीनामा स्विकृत गर्दै पौडेलले तीन दिनभित्र नयाँ सरकार गठनको लागि आव्हान गरेकी छिन्।

सोही आव्हान बमोजिम प्रतिपक्षी दलहरु नेपाली कांंग्रेस, नेकपा माओवादी केन्द्र र जनता समाजवादी पार्टी नयाँ सरकारको लागि दावी पेश गर्न तयारी अवस्थामा रहेका छन्। तर नयाँ सरकारको लागि निर्णायक मानिएको जनमोर्चा भने अझै अनिर्णित छ।