मोरङमा तीन घण्टामा ६ संक्रमितको मृत्यु 

विराटनगर – मोरङमा सोमबार बिहान तीन घण्टाको अवधिमा ६ जना कोरोना संक्रमितको मृत्यु भएको  छ। विराट शिक्षण अस्पताल बुढीगंगामा तीन, नोबेल शिक्षण अस्पताल विराटनगरमा दुई र न्यूरो अस्पताल विराटनगरमा एक संक्रमितको मृत्यु भएको हो। 

न्यूरो अस्पतालमा विराटनगर महानगरपालिका–११ की ६७ वर्षीया  महिलाको बिहान ५:५० बजेतिर मृत्यु भएको छ। उपचारकै क्रममा उनको मृत्यु भएको हो। पीसीआर परीक्षण गराउँदा कोरोना पुष्टि भएपछि उनलाई उपचारका लागि आइतबार अस्पताल भर्ना गरिएको थियो। 

विराट शिक्षण अस्पतालमा विराटनगर–११ का ४६ वर्षीय पुरुषको बिहान ७:५५ बजेतिर मृत्यु भएको छ। कोरोना पुष्टि भएपछि उनलाई उपचारका लागि वैशाख २० गते भर्ना गरिएको थियो। उपचारकै क्रममा आइसोलेसनमा उनको मृत्यु भएको विराटका कोभिड अस्पताल इन्चार्ज सुनिल देवले जानकारी दिए। 

विराटनगर–१३ की ७८ वर्षीया महिलाको पनि विराटमै मृत्यु भएको छ। उनलाई उपचारका लागि वैशाख १७ गते अस्पताल भर्ना गरिएको थियो। उनको बिहान ५:१५ बजेतिर मृत्यु भएको जानकारी देवले दिए। 

सुनसरीको दुहवी नगरपालिका–११ का ३८ वर्षीय पुरुषको पनि विराटमै उपचारका क्रममा मृत्यु भएको  छ। कोभिड अस्पताल इन्चार्ज देवका अनुसार बिहान ५:३० बजेतिर उनको मृत्यु भएको हो। 

सुनसरीको बराहक्षेत्र नगरपालिका–११ की ३५ वर्षीया महिलाको बिहान ५ बजेतिर नोबेल शिक्षण अस्पतालमा मृत्यु भएको छ। अस्पतालका प्रबन्धक नारायण दाहालका अनुसार कोरोना पुष्टि भएकी महिलालाई वैशाख २४ गते उपचारका लागि भर्ना गरिएको थियो। 

सिरहाको भवानीपुर– ४ का ५० वर्षीय पुरुषको पनि मृत्यु भएको छ। उपचारका क्रममा बिहान ५:१५ बजेतिर नोबेलमै उनको मृत्यु भएको प्रबन्धक दाहालले बताए।