यी हुन् निषेध आदेश भएका ६३ जिल्ला

काठमाडौं-  कोरोना भाइरस महामारी तीव्र रुपमा फैलिएपछि ६३ जिल्लामा निषेध आदेश जारी गरिएको छ। गृह मन्त्रालयको विवरणअनुसार शनिबारसम्म ५३ जिल्लामा जिल्लाभर र १० जिल्लामा प्रभावित क्षेत्रमा निषेध आदेश जारी गरिएको हो। 

बाँके, सुर्खेत, काठमाडौं, ललितपुर, भक्तपुर, कास्की, कैलाली, पर्सा, दाङ, कञ्चनपुर, पाल्पा, चितवन र  रुपन्देहीमा आवातजावतमा पूर्ण रोक लगाइएको छ। यस्तै बागलुङ, बर्दिया, सल्यान, सुनसरी, दार्चुला, जाजरकोट, रुकुम पश्चिम, डडेल्धुरा, झापा, मोरङ, गुल्मी, प्यूठान, गोरखा, बाजुरा, उदयपुर र बझाङमा पनि पूर्ण रुपमा निषेध आदेश लगाइएको छ।

पूर्ण निषेध आदेश जारी भएका अन्य जिल्लामा कालिकोट, स्याङ्जा, कपिलवस्तु, नुवाकोट, धनुषा र अर्घाखाँची छन्। बैतडी, दैलेख, महोत्तरी, डोल्पा, डोटी, नवलपरासी पूर्व, रोल्पा, मुगु, बारा, सिरहा, नवलपरासी पश्चिम, दोलखा, अछाम, हुम्ला, धादिङ, रौतहट, संखुवासभा र सर्लाहीमा जिल्लाभर निषेध आदेश जारी छ। 

यस्तै काभ्रेपलाञ्चोक, पर्वत, मकवानपुर, रामेछाप, ताप्लेजुङ, म्याग्दी, तनहुँ, इलाम, सिन्धुपाल्चोक र धनकुटाका कोरोना प्रभावित क्षेत्रमा मात्र निषेध आदेश जारी गरिएका गृह मन्त्रालयले जनाएको छ।

सरकारले ग्रामीण क्षेत्रमा २०० र सहरी क्षेत्रमा ५०० कोरोनाका सक्रिय संक्रमित पुगेसँगै निषेध आदेश लगाउन सक्ने अधिकार स्थानीय प्रशासनलाई प्रत्यायोजन गरेको छ। सोही अधिकारको प्रयोग गर्दै स्थानीय प्रशासनले जिल्लाभर वा प्रभावित क्षेत्रमा निषेध आदेश लगाउँदै आएका छन्।

स्वास्थ्य मन्त्रालयका अनुसार शनिबारसम्म ३ लाख ८५ हजार ८९० जनामा कोरोना संक्रमण पुष्टि भएकोमा २ लाख ९८ हजार ७६५ निको भएका छन्। तीमध्ये ३ हजार ६३२ जनाको मृत्यु भएको छ।

हाल मुलुकभर ८३ हजार ४९३ सक्रिय संक्रमित छन्। यस्तै शनिबार मात्र थप ८ हजार ४१८ जनामा कोरोना संक्रमण पुष्टि भएको छ भने ५३ जनाको निधन भएको छ।