पर्सामा कोरोनाबाट थप ३ जनाको मृत्यु

वीरगंज- पर्सामा उपचारको क्रममा थप ३ जना कोरोना संक्रमितको मृत्यु भएको छ। वीरगंजस्थित नारायणी अस्पतालमा उपचाररत बारा जिल्लाका २ जना र रौतहटका एकजना गरी ३ जनाको मृत्यु भएको अस्पतालले जनाएको छ। 

मृत्यु हुनेमा बुधबार भर्ना भएका बाराका ४५ वर्षीय पुरुष र वैशाख ८ गते भर्ना भएका ५५ वर्षीय पुरुष छन्। 

त्यसैगरी रौतहट सिर्सियाका ५५ वर्षीय पुरुषको पनि उपचारको क्रममा मृत्यु भएको नारायणी अस्पतालका कोभिड संयोजक डा. सरोजरोशन दासले जानकारी दिए।

तीनै जनामा कोरोना संक्रमणपछि गम्भीर प्रकारको निमोनिया देखिएको थियो। 

यसैबीच पर्सामा पछिल्लो २४ घण्टामा १४५ जना कोरोना संक्रमित थपिएका छन्। पर्सा, बारा, सर्लाहीलगायतका जिल्लाबाट आएका २८८ जनाको स्वाबलाई अस्पतालको प्रयोगशालामा पीसीआर परिक्षण गर्दा ९ जना एन्टीजेनसहित १४५ जनामा कोरोना संक्रमण पुष्टि भएको हो।

संक्रमित हुनेमा ९ वर्षीय बालकदेखि ८८ वर्षका वृद्धसमेत छन्। तीमध्ये ४५ जना महिलासहित पर्साका १०५ जना, बाराका २७, रौतहटका ८, सर्लाहीका ४ र महोत्तरीका १ जना छन्।