देउवा र दाहालबीच बूढानीलकण्ठमा छलफल जारी

काठमाडौं- नेकपा माओवादी केन्द्रका अध्यक्ष पुष्पकमल दाहाल र नेपाली कांग्रेसका सभापति शेरबहादुर देउवाबीच भेटवार्ता जारी छ।
सभामुख अग्नि सापकोटालाई भेटेर सिधै दाहाल देउवासँग छलफल गर्न बूढानीलकण्ठमा पुगेका हुन्।

प्रधानमन्त्री कोपी शर्मा ओलीले यही वैशाख २७ गते संसदको विशेष अधिवेशनबाट विश्वासको मत लिने भएपछि यसबारे छलफल गर्न दाहाल बूढानीलकण्ठ  पुगेका हुन्।

यसअघि लगातार बुधबार साँझ प्रधानमन्त्री ओली र उनी निकट नेताहरु, हिजो (बिहीबार) एमाले नेता माधव नेपाल र उनी निकट नेताहरु देउवालाई भेट्न बूढानीलकण्ठ पुगेका थिए।

ओलीले आफूलाई विश्वासको मत दिन देउवासँग आग्रह गरेका थिए। देउवासहित नेपाली कांग्रेसका नेताहरुले ओलीलाई विश्वासको मत दिन नसकिने जनाउ दिएका थिए। 

बिहीबार साँझ पुगेका नेता माधव नेपालले पनि ओलीलाई विश्वासको मत पुग्न नदिने गरी वातावरण बनाउनेबारे छलफल गरेका थिए।

आजको छलफलमा ओलीलाई विश्वासको मत नदिने, बागमती प्रदेशमा हुन लागेको राष्ट्रियसभाको उपनिर्वाचनलगायतका विषयमा कुराकानी हुन लागेको बताइएको छ।