भारतको कर्नाटकमा अक्सिजन नपाएर १२ संक्रमितको मृत्यु

एजेन्सी- भारतको कर्नाटकस्थित चामाराजानगर जिल्लाको एक अस्पतालमा अक्सिजन नपाएर १२ कोरोना संक्रमितको मृत्यु भएको छ।

मैसूरबाट ६० किलोमिटर टाढा रहेको उक्त अस्पतालले अक्सिजनको चरम संकट झेल्दै आएको छ।
चामाराजानगर इन्स्टिच्युट अफ मेडिकल साइन्सका चिकित्सकहरुले गरेको अथक प्रयासले पनि कोरोना संक्रमितको ज्यान जोगाउन नसकेको भारतीय सञ्चार माध्यमरुले जनाएका छन्।

मेडिकल कलेजका डिन डा.जीएम सञ्जीवले राति १२ बजेदेखि २ बजेको बीचमा अक्सिजनको प्रेसर कम भएको थियो। १२२ जना संक्रमितमध्ये १२ जना कोरोनासहित अन्य गम्भीर रोगबाट पीडित थिए। ‘हामीले अक्सिजन बढाएर दिने प्रयास गरेका त हौँ तर १२ जनालाई बचाउन सकेनौँ।’ उनले भने।

ती सबै बिरामी भेन्टिलेटरमा थिए। उनका अनुसार त्यो अस्पतालमा हरेक ३५ मिनेटमा १० सिलिण्डर अक्सिजनको आवश्यकता पर्छ। तर अक्सिजन पर्याप्त मात्रामा पाउनै सकिएको छैन।

त्यो बाहेक यस अस्पतालमा अन्य ११ जनाको मृत्यु भएको छ। उनीहरुलाई अक्सिजन दिइएको थिएन। अस्पतालले ११ जनाको मृत्युको कारण कोराना नभई अरु नै रहेको बताएको छ।