राजकर्णिकार, क्षत्री, दासी र अधिकारीलाई नइ पुरस्कार

नियात्रापरक निबन्धका क्षेत्रमा विशिष्ट सिर्जनात्मक योगदान गरेबापत घनश्याम राजकर्णिकारलाई ६० हजारसहित ‘नइ देरुनीख प्रदीप्ति पुरस्कार’ समर्पण गर्ने निर्णय प्रकाशनले गरेको जानकारी दिइएको छ।

नेपाल समय | आइतबार, वैशाख १२, २०७८

नेपाल समय

आइतबार, वैशाख १२, २०७८

राजकर्णिकार, क्षत्री, दासी र अधिकारीलाई नइ पुरस्कार

काठमाडौं- नइ प्रकाशनले चार जनालाई २०७७ सालको नइ पुरस्कार समर्पण गर्ने घोषणा गरेको छ। प्रकाशनका अध्यक्ष इन्दिरा प्रसाईंका अध्यक्षतामा आइतबार बसेको बैठकले चार जनालाई पुरस्कार प्रदान गर्ने निर्णय गरेको हो।

पुरस्कार प्राप्त गर्नेमा घनश्याम राजकर्णिकार, भवानी क्षत्री, राधिका दासी र युवराज अधिकारी छन्। नियात्रापरक निबन्धका क्षेत्रमा विशिष्ट सिर्जनात्मक योगदान गरेबापत राजकर्णिकारलाई ६० हजारसहित ‘नइ देरुनीख प्रदीप्ति पुरस्कार’ समर्पण गर्ने निर्णय प्रकाशनले गरेको जानकारी दिइएको छ।

त्यसैगरी, राजधानीबाहिर बसेर नेपाली भाषासाहित्यको श्रीवृद्धिका लागि निरन्तर समर्पित झापाका भवानी क्षत्रीलाई ५० हजारसहित ‘नइ बुलु शर्मा पुरस्कार’ दिइने भएको छ। यस्तै, हिन्दूधर्म, संस्कृति र समाजसेवामा समर्पित भागवतमञ्जरी श्रीराधिका दासीलाई ५० हजारसहित ‘नइ देरुनीख गौरव पुरस्कार’ समर्पण गरिने प्रकाशनका सदस्यसचिव नरेन्द्रराज प्रसाईंले जानकारी दिए।

यस्तै, नेपाली भाषासाहित्यमा कविता लेखन तथा वाचनमा समेत उदाहरण प्रस्तुत गर्नाका साथै आफ्नो शैक्षिकस्तरलाई पनि गुणस्तरीय बनाउने युवराज अधिकारी ’स्मरण’लाई २५ हजारसहित ‘नइ देरुनीख पौैरख पुरस्कार’ समर्पण गरिने बताइएको छ।

प्रकाशित: Apr 25, 2021| 09:28 आइतबार, वैशाख १२, २०७८