वडाध्यक्षको दादागिरी : युवकलाई दाम्लाले बाँधेर निर्घात कुटपिट [भिडियाेसहित]

सुर्खेत– जाजरकोटको जुनीचाँदे गाउँपालिका–२ का वडाध्यक्ष रामबहादुर नेपालीले स्थानीय युवालाई बाँधेर निर्घात कुटपिट गरेका छन्। सामाजिक सुरक्षा भत्ता बाँड्ने क्रममा होहल्ला गरेको भन्दै वडाध्यक्ष नेपालीसहितको समूहले सोही ठाउँका सर्ते नेपाली (नवीन परियार) लाई कुटपिट गरेका हुन्।

स्थानीय एक युवकले खिचेको भिडियोमा वडाध्यक्ष आफैंले कुटपिट गरिरहेको देखिन्छ। वडाध्यक्ष नेपालीले दाम्लोले हातखुट्टा बाँधेर कुटपिट गरिरहेका छन्। हल्ला किन गरेको भन्दै लुगा च्यातिने गरी वडाध्यक्ष नेपालीसहितको टोलीले कुटपिट गरेको देखिन्छ। घटना साउन १५ गते भएको स्थानीयले बताएका छन्। 

वडाध्यक्ष नेपाली भने आफूले कुटपिट नगरेको दाबी गर्छन्। उनले सम्झाइबुझाइ गर्दा अटेर गरेपछि केही व्यक्तिले कुटपिट गरेको बताए। भिडियोमा उनी आफैंंले कुटपिट गरेको देख्न सकिन्छ। उनले भने, ‘ढुंगामुढा गर्दै हिँडेर जथाभाबी बोलेपछि आमाबाबुकै आग्रहमा हामीले नियन्त्रणमा लिने प्रयास गरेका हौंं।’ 

नवीन र आफूबीच कुनै दुस्मनी नभएको उनले बताए। पीडितका पिता रंगे दमाईं पनि  परिवार र वडाध्यक्षबीच दुस्मनी नभएको बताउँछन्।