प्रधानमन्त्री कपमा आर्मीको जीत

काठमाडौं । प्रधानमन्त्री कप एक दिवसिय क्रिकेट प्रतियोगिता अन्तर्गत शुक्रबार भएको खेलमा आर्मी विजयी भएको छ भने, पुलिस र प्रदेश ६ ले एक एक अंक बाँडेका छन् । 

पहिलो खेलमा त्रिभुवन आर्मीले प्रदेश १ लाई १०६ रन अन्तरले पराजित गर्‍यो । कीर्तिपुर किकेट मैदानमा टस हारेर पहिले ब्याटिङको निम्तो पाएको आर्मीले निर्धारित ४५ ओभरमा ९ विकेटको क्षतिमा २२५ रन बनायो । 

आर्मीका लागि कप्तान विनोद भन्डारीले विष्फोटक ब्याटिङ गर्दै २९ बलमा ६४ रनको पारी खेले । आर्मीलाइ सम्मानजनक स्कोर सम्म पुर्‍याउन अनिल मण्डललले ३६, नरेश बुढायेरले ३२ र विक्रम सोबले १६ रनको योगदान गरे । 

बलिङ तर्फ प्रदेश १ का मनोज तामाङले ९ओवरमा ३९ रन खर्चेर ३ विकेट लिए । फिर्दोस अन्सारी र मिनाश थापाले समान २/२ विकेट लिए । २२६ रनको लक्ष्य पछ्याएको प्रदेश १ ले २९ दशमलव ३ ओवरमा सबै विकेट गुमाएर ११९ रन मात्र वनाउन सक्यो । 

प्रदेश १ का लागि कप्तान पुष्प थापाले सर्वाधिक ५९ रन बनाए । अन्य खेलाडि क्रिजमा जम्न नसक्दा आर्मीको जित सहज बनेको हो । 

प्रदेश १ का दुइ खेलाडि बाहेक अन्य खेलाडिले दोहोरो अंक छुन सकेनन् । आर्मिका लागि सुसान भारीले ४ विकेट हात पारे भने सोमपाल कामि, विक्रम सोव र सागर पुनले समान २/२ विकेट लिए । 

मुलपानि क्रिकेट मैदानमा हुने भनिएको दोस्रो खेल वर्षका कारण रोकिँदा नेपाल प्रहरी र प्रदेश नम्बर ६ ले समान एक एक अंक बाँडेका छन् ।