म्यानमारमा सैनिकसँगको झडपमा थप ११ जनाको मृत्यु

एजेन्सी- म्यानमारमा सैनिक शासकविरुद्ध जारी प्रदर्शनमा बिहीबार ११ जनाको मृत्यु भएको छ। स्थानीय सञ्चारमाध्यहरुका अनुसार म्यानमारको एक उत्तरी सहरमा सैनिकसँग झडप भएको थियो।

बुधबार टेज सहरमा प्रदर्शनकारीलाई रोक्न सैन्य सरकारले ६ ट्रक सैनिक उतारेको थियो।
प्रदर्शनकारीले सैनिकसँग भिड्न बन्दुक, चक्क तथा फायरबम प्रयोग गरेको स्थानीय सञ्चारमाध्यमलाई उद्धृत गर्दै अलजजिराले समाचार प्रकाशित गरेको छ। स्थानीयले घरेलु हतियार प्रयोग गरेपछि थप ५ ट्रक सैनिक टेज सहरमा झारिएको थियो।

बुधबारदेखि बिहीबारसम्म लगातार झडपहरु भएको जनाइएको छ। बिहीबारसम्म ११ जनाको मृत्यु भएको र २० भन्दा बढी घाइते भएको समाचारमा जनाइएको छ।

सैनिकतर्फ भने कुनै क्षति भएको विवरण सार्वजनिक गरिएको छैन।
म्यानमारमा गत फेब्रुअरी १ मा भएको सैन्य कुपछि हालसम्म जारी प्रदर्शनमा झण्डै ६ सय सर्वसाधारण मारिएका छन्।