हामी उल्टो बाटो हिँडिरहेका छौं : सांसद लिंग्देन

काठमाडौं– राप्रपाका सांसद राजेन्द्र लिंग्देनले देश उल्टो बाटो हिँडिरहेको टिप्पणी गरेका छन्।

प्रतिनिधिसभाको आजको बैठकमा उनले भने, ‘हामी कहाँ जाने भनेर हिँडेको कहाँ पुग्यौं ?  बाटो उल्टो भयो भने हामीले पहिलैदेखि भनेका थियौ। हाम्रो स्वर सानो थियो, संख्या सानो थियो। आज हामी अस्थिरता र अनिश्चयको सामना गरिरहेका छौं। यो कुनै एक व्यक्ति र एक पार्टीको मात्र असफलता होइन, यो हाम्रो प्रणालीको असफलता हो।’ 

अहिलेकै अवस्थामा सरकार परिवर्तन र निर्वाचन जुन बाटोको अवलम्बन गरे पनि अस्थिरता, भ्रष्टाचार र वैदेशिक हस्तक्षेपको सामना गर्नुपर्ने उनले बताए। वर्तमान सरकारसँग धेरै कुराहरुमा विमति र असहमति भए पनि अहिले त्यसबाट शिक्षा लिएर नयाँ सम्झौता गर्नुपर्ने उनको भनाइ छ।

‘गत वर्ष विखन्डनको कुरा गर्ने सिके राउत र यो वर्ष नेत्रविक्रम चन्दलाई राष्ट्रको मूल प्रवाहमा ल्याउने काम गरेको छ। सरकारलाई धन्यवाद। विखण्ड र विद्रोहको कुरा गर्ने राउत र चन्दलाई मात्रै होइन, अनेक लान्छाना लागे पनि शान्त रहेको राजसंस्थालाई स्थान दिएर राष्ट्रिय एकता कायम गरौं,’ उनले भने।

लिंग्देनले थपे, ‘देशलाई अशान्ति र अस्थितरतातर्फ लैजानबाट रोक्न राजसंस्थालाई पनि स्थान दिऔं। जनताबाट प्रत्यक्ष निर्वाचित प्रधानमन्त्री चुनौं। सांसद मन्त्री हुन नपाउने व्यवस्था गरौं। संसदलाई पूर्ण समानुपातिक बनाऔं।’