एमाले प्रवेश गरेका माओवादीका प्रदेश सांसद न्यौपाने र पन्थीलाई कारबाही

बुटवल- लुम्बिनी प्रदेशसभाका २ जना सांसद कारबाहीमा परेका छन्। नेकपा माओवादी केन्द्रवाट निर्वाचित सांसद दधिराम न्यौपाने र दिनेश पन्थीलाई पार्टीको संसदीय दलले प्रदेश सभामुख समक्ष कारबाहीको सिफारिस गरेको हो।

दल त्याग गरेकाले न्यौपाने र पन्थीको सांसद पद नै खारेज हुने भएको छ। सोमबारको प्रदेशसभाको बैठकमा सभामुखले कारबाहीको लागि पठाएको पत्र सभामा जानकारी गराउने कार्यक्रम रहेको प्रदेशसभाका सचिव दुर्लभ कुमार पुन मगरले बताए।

माओवादीको संसदीय कार्यालयबाट कारबाहीका लागि पठाइएको पत्र सभामुख पूर्णबहादुर घर्तीलाई जानकारी गराइसकिएको र प्रदेशसभा नियमावली १९१ अनुसार अगाडि बढाउन निर्देशन भएको सचिव मगरले बताए। 

नियमावली १९१ अनुसार सदन जारी रहेको अवस्थामा बैठकमा जानकारी गराउने वा सूचना पार्टीमा सूचना टाँस गर्नु पर्ने व्यवस्था रहेको छ। 

प्रदेश सभाको वैठक जारी रहेको र सोमबार सभामा सभामुखले कारबाहीबारे जानकारी गराने बताइएको छ। सभामुखले सभामा जानकारी गराएपछि नियमावली १९२ अनुसार पद रिक्त हुने कानुनी व्यवस्था छ।

नेकपा माओवादी केन्द्र छाडेर एमालेमा प्रवेश गरेका लुम्बिनी प्रदेशका सांसदद्वय न्यौपाने (रुपन्देही) र पन्थी(गुल्मी) लाई माओवादीले कारबाही गरेको हो। 

एमालेमा प्रवेश गरेर ओली समूहको केन्द्रीय सदस्य बनेका न्यौपाने र पन्थीलाई पार्टीले कारवाही गरेपछि उनीहरुको सांसद पद खारेज हुने भएको हो।

लुम्बिनी प्रदेशमा माओवादी केन्द्रले मुख्यमन्त्री शंकर पोखरेललाई दिँदै आएको समर्थन फिर्ता लिने गृहकार्यसमेत सुरु भएको बताइएको छ। 

लुम्बिनी प्रदेशमा कुल ८७ सांसद छन्। सरकारमा बहुमत जुटाउनका लागि ४४ सीट चाहिन्छ। एमालेसँग ४१ सिटमात्र छ। माओवादीबाट गएका न्यौपाने र पन्थीलाई माऊ पार्टीले कारबाही गरेपछि एमालेलाई बहुमतका लागि तीन सीट पुग्दैन।

प्रदेशसभामा एमालेसँग ४१ सीट छ भने माओवादीको २० सांसद छन्। तीमध्ये माओवादीका एकजना सभामुख भएकाले भोटिङ गर्न १९ जनाले मात्रै पाउँथे तर २ जनालाई कारबाही भएपछि १७ जना मात्र रहने छन्। प्रदेशसभामा नेपाली कांग्रेसका १९ सांसद छन्। जसपाको ६ सीट र राष्ट्रिय जनमोर्चाको एक सीट छ।