विकल्पबिना नछोडौं भनेर समर्थन फिर्ता नलिएका हौं : वर्षमान पुन

काठमाडौं – माओवादी केन्द्रका नेता वर्षमान पुनले बिना विकल्प सरकारलाई दिएको समर्थन फिर्ता नलिने बताएका छन्। 

नेपालसमयसँग कुरा गर्दै नेता पुनले सरकार गठनका लागि विकल्प तयार भएपछि मात्रै समर्थन फिर्ता लिइने बताएका हुन्। 

‘हामीले संसद् मात्रै होइन, संविधान पनि बचाउनुपर्छ,’ उनले भने। विकल्प बिना समर्थन फिर्ता लिए र प्रधानमन्त्रीले आफू अल्पमतमा परे उपधारा ३ प्रयाेग गर्ने संकेत देखिएकाे उनको भनाइ छ।

‘राजीनामापछि ठूलो दलको हिसाबले विश्वासकाे मत गर्न नसके फेरि चुनावमै जाने निर्णय हुन सक्ने भएकाले बिना विकल्प बाटोमै नछोडौं भनेर समर्थन फिर्तामा ढिलाइ भएको हो,’ उनले भने।

यस्तै उनले आजको स्थायी कमिटी बैठक विभिन्न नेताहरू काठमाडौं बाहिर रहेकाले ३–४ दिनका लागि स्थगित भएको बताए।

कांग्रेसले गरेको निर्णय सकारात्मक भएको भन्दै जसपासँग पनि सरकार गठनका विषयमा छलफल भएको पुनको भनाइ छ।