बंगलादेशमा पूर्ण लकडाउनको तयारी

काठमाडौं- कोरोना भाइरसको संक्रमण पुनः बढेपछि बंगलादेशमा पूर्ण लकडाउनको तयारी गरिएको छ।

बंगलादेश सरकारका राज्यमन्त्री फरहाद हुसैनले भोलि (सोमबार)देखि देशभर एक हप्ताका लागि पूर्ण लकडाउनको तयारी भइरहेको बीबीसीलाई बताएका छन्।

हुसैनले लकडाउनको घोषणा गर्दा आम जनतालाई तयारीको समय दिने बताएका छन्।

एक अर्का मन्त्रीले पनि स्थानीय संचार माध्यमहरुसँग कुरा गर्दै लकडाउनको तयारी भइरहेको खुलासा गरेको बीबीसीले जनाएको छ।

बंगलादेशको यस पटकको लकडाउन कत्तिको कडा पारिने छ र के के क्षेत्र खुला रहनेछन् भन्नेबारे सरकारले आधिकारिकरुपमा केही घोषणा गरेको छैन।

गत हप्ता त्यहाँ कोरोनाबाट संक्रमित हुनेको संख्या निकै धेरै रहेको एजेन्सीहरुको भनाइ छ।

शुक्रबार झण्डै ३० हजार स्याम्पल परीक्षण गरिएकोमा ६ हजार ६०० जनामा कोरोना पोजेटिभ देखिएको थियो।

पछिल्लो २४ घण्टामा त्यहाँ ५० जनाको मृत्यु भएको तथ्यांक छ। कोरोनाका कारण गत वर्ष सन् २०२० मा त्यहाँ ३ महिना लकडाउन गरिएको थियो।