अर्जेन्टिनाका राष्ट्रपतिलाई कोरोना संक्रमण

ब्युनस आयर्स- दक्षिण अमेरिकी मुलुक अर्जेन्टिनाका राष्ट्रपति अल्बर्टो फर्नान्डेजलाई कोभिड–१९ सङ्क्रमण भएको छ। कोभिड–१९ को खोप लगाइसकेका राष्ट्रपतिलाई सङ्क्रमण देखिएको राष्ट्रपति कार्यालयले शुक्रबार जानकारी दिएको छ। 

राष्ट्रपति फर्नान्डेजले ट्विट गर्दै आफूलाई ज्वरो र हल्का टाउको दुखेपछि एन्टिजेन परीक्षण गराएको र त्यसले कोभिड–१९ पोजेटिभ देखाएको उल्लेख गरेका छन्। 

६२ वर्षीय राष्ट्रपति फर्नान्डेजले आफू आइसोलेसनमा रहेपनि शारीरिक रुपमा तन्दुरुस्त रहेको उल्लेख गरेका छन्। 

राष्ट्रपति फर्नान्डेजले रसियाली स्पुतनिक-भी खोप लगाएका थिए। खोपको दोस्रो डोज फेब्रुअरी ११ मा लगाएका राष्ट्रपतिलाई कोरोना संक्रमण भएको हो। 

अर्जेन्टिनामा कोभिड–१९ को दोस्रो लहर चलेको छ र कोरोना सङ्क्रमितको संख्या दिनहुँ बढेको पाइएको छ। 

अर्जेन्टिनामा कोभिडबाट २३ लाख मानिस सङ्क्रमित भएका र ५५ हजारभन्दा बढी व्यक्तिको निधन भइसकेको छ। -रासस/एएफपी