ताइवानमा रेल दुर्घटना हुँदा मृत्यु हुनेको संख्या ४८ पुग्यो

ताइवान- ताइवानमा रेल दुर्घटनामा परी कम्तीमा पनि ४८ जनाको मृत्यु भएको छ। ताइवानको राजधानी ताइपेईबाट ताइतुङतर्फ जाँदै गरेको रेल शुक्रबार दुर्घटना भएको हो। रेलका चालकको पनि मृत्यु भएको बताइएको छ।

करिब ५ सय जना रहेको उक्त रेल निर्माणको काम गर्ने उपकरणमा ठोक्किएर दुर्घटना भएको बताइएको छ। दुर्घटनामा कम्तीमा ७० जना घाइते भएका हुन्।  

स्थानीय समयअनुसार बिहान ९ बजे रेल दुर्घटना भएको हो। रेलको पछिल्तिर रहेका यात्रुलाई भने कम क्षति भएको बताइएको छ। दुर्घटनापछि रेल सुरुङतर्फ चिप्लिएको बिबिसीले समाचार प्रकाशन गरेको छ। ट्रेनमा धेरै मानिसहरू उभिएरै यात्रा गरिरहेका थिए। दुर्घटनापछि केही यात्रीहरूले रेलका झ्याल फुटाएर बाहिर निस्किएका थिए। 

'मलाई एक्कासी झड्का लागेजस्तो भयो। यसपछि म आफैँ भुईमा लडेँ,' दुर्घटनामा घाइते भएर उद्धार गरिएकी एक महिलाले ताइवानी समाचार संस्थालाई भनेकी छन्, 'यसपछि हामीले रेलको झ्याल तोडेर बाहिर निस्कियौँ।'

'मेरो शरीर भुईंमा ढल्यो। मेरो टाउकोमा चोट लागेर रगत आउन पनि थाल्यो,' अर्की एक घाइते महिलाले भनेकी छन्। 

शुक्रबार नै ताइवानी प्रधानमन्त्री सुत्सेङ चाङले दुर्घटनास्थलको भ्रमण गरिसकेका छन्। 

ताइवानमा विगत एक दशकयताकै सबैभन्दा ठूलो दुर्घटना भएको बताइएको छ। यसअघि सन् २०१८ मा ताइवानमा रेल दुर्घटना भएको थियो दुर्घटनामा परी १८ जनाको मृत्यु भएको थियो। सन् १९९१ मा ताइवानमा दई रेल आपसमा जुध्दा ३० जनाको मृत्यु भएको थियो भने ११२ जना घाइते भएका थिए।