अन्तर्राष्ट्रिय श्रमिक महिला दिवसमा १३ जना सम्मानित

विराटनगर- १११ औँ अन्तर्राष्ट्रिय महिला दिवसको अवसरमा सोमबार १३ जनालाई सम्मान गरिएको छ।

सामाजिक विकास मन्त्रालयले कोभिड–१९ को महामारीमा जनताको सेवामा उत्कृष्ट रुपमा कार्य गर्ने मोरङ, सुनसरी, उदयपुर, झापा र धनकुटाका कोभिड अस्पताल, प्रयोगशालामा काम गर्नेलाई सम्मान गरेको हो। 

सम्मानित हुनेहरुमा ११ जना स्वास्थ्यकर्मी र दुई जना महिला प्रहरी छन्। प्रदेश नं १ का प्रदेश प्रमुख सोमनाथ अधिकारी ‘प्यासी’ले सम्मानित गरे। १३ जनालाई सम्मानित गर्दै प्रदेश प्रमुख अधिकारीले महिलाहरुले व्यापकताभन्दा गहिराइमा जानुपर्नेमा जोड दिए। उनले देश बनाउने नयाँ सोच र उद्देश्य लिएर असल नागरिक बन्न आग्रह गरे।

आन्तरिक मामिला तथा कानून एवम् सामाजिक विकास मन्त्री हिक्मतकुमार कार्कीले महिलाले नेतृत्व गरेका स्थानमा व्यवस्थापन उत्कृष्ठ रहेको बताए। महिला नेतृत्व सफलताको द्योतक भएको उनले बताए। 

सामाजिक विकास मन्त्रालय र विभिन्न सामाजिक संघ संस्थाहरुको आयोजनामा भएको कार्यक्रमअघि जिल्लाप्रशासन कार्यालय मोरङबाट निस्किएको प्रभातफेरीले नगरको मुख्यमुख्य भागको परिक्रमा गरेको थियो।