नेता र सांसदले लगाए कोरोना खोप

काठमाडौं– विभिन्न राजनीतिक दलका नेता, सभामुख र सांसदहरुले कोरोना भाइरस विरुद्धको खोप लगाएका छन्।

सभामुख अग्निप्रसाद सापकोटा, नेकपा दाहाल–नेपाल समूहका अध्यक्षद्वय पुष्पकमल दाहाल र माधवकुमार नेपालले बुधबार बिहान राजधानीको निजामती अस्पतालमा पुगेर खोप लगाएका हुन्। 

यस्तै स्वास्थ्य तथा जनसंख्यामन्त्री हृदयेश त्रिपाठीले पनि खोप लगाएका छन्। फागुन २३ गते संसद् बैठक सुरु हुने भएकाले त्यसअघि नै सांसद र नेताहरूलाई खोप लगाउने व्यवस्था स्वास्थ्य तथा जनसंख्या मन्त्रालयले गरेको हो।

खोप लगाएपछि स्वास्थ्यमन्त्री त्रिपाठीले भने, ‘२३ गतेपछि लगाउने योजनामा थिएँ। संसद् बैठक सुरु हुने भएकाले आजै लगाएको हुँ।’

स्वास्थ्य तथा जनसंख्या मन्त्रालयअन्तर्गत राष्ट्रिय स्वास्थ्य शिक्षा तथा सूचना तथा सञ्चार केन्द्रका अनुसार बुधबार बिहान १० बजेदेखि खोप लगाउन थालिएको हो।

पहिलो चरणमा अग्रपंक्तिमा खटिने स्वास्थ्यकर्मी, चिकित्सक, सुरक्षाकर्मी, पत्रकार, जनप्रतिनिधिलाई खोप लगाइएको छ भने २३ गतेदेखि दोस्रो चरणको खोप लगाइँदै छ। दोस्रो चरणमा ५५ वर्षभन्दा माथिका नागरिक, शिक्षक, विद्यार्थीलगायतलाई प्राथमिकतामा राखिएको स्वास्थ्य मन्त्रालयले जनाएको छ।