‘सरकार–विप्लव पहिलो वार्ता सकारात्मक’

काठमाडौं– सरकार र नेत्रविक्रम चन्द (विप्लव) नेतृत्वकाे नेकपाबीच पहिलो वार्ता सकिएकाे छ। 

प्रधानमन्त्री निवास बालुवाटारमा बुधबार बिहान भएको वार्ता सकारात्मक रहेकाे सरकारी वार्ता टोलीका सदस्य राजन भट्टराईले जानकारी दिए।

भट्टराईले  सामाजिक सञ्जालमा लेखेका छन्, ‘दुई पक्षबीच पहिलो चरणको वार्ता आज बिहान सम्पन्न भएको छ। वार्ता सकारात्मक दिशाउन्मुख रहेको जानकारी गराउँछु।’

दुई पक्षबीच बुधबार बिहान ९ बजे प्रधानमन्त्री निवास बालुवाटारमा वार्ता सुरु भएको थियो। 

वार्तामा सरकारका तर्फबाट गृहमन्त्री रामबहादुर थापा र प्रधानमन्त्रीका परराष्ट्र सल्लाहकार राजन भट्टराई तथा विप्लवका तर्फबाट प्रवक्ता खडकबहादुर विश्वकर्मा र उदय चलाउने सहभागी थिए।

सरकारले गत वर्ष फागुन २८ गते विप्लवका गतिविधि प्रतिबन्ध लगाएको थियो। त्यसपछि विप्लवका कार्यकर्ताले देशका केही ठाउँमा हिंसात्मक गतिविधि गर्दै आएका थिए।

सरकारले मंगलबार वार्ता टोली गठन गरेपछि विप्लव पनि वार्तामा बस्न तयार भएको हो। सरकारले वार्ता गरे पनि विप्लव नेकपाका गतिविधिमाथि लगाएको प्रतिबन्ध भने फुकुवा गरेको छैन।

अब अर्को वार्ता कहिले हुन्छ भन्नेमा केही खुलाइएको छैन।