फुङ्लिङमा आगलागीबाट ३९३ परिवार विस्थापित

ताप्लेजुङ - ताप्लेजुङको फुङ्लिङ बजारमा विभिन्न समयमा ठूला-ठूला आगलागी घटना दोहोरिरहने क्रम विगतदेखि नै चलिरहेको छ।

पछिल्लो १७ वर्षमा आगलागीबाट ३९३ परिवार विस्थापित हुन पुगेको र १५२ घर जलेर नष्ट भएको तथ्यांक छ।

२०६० चैत १५ गते वीरेन्द्रचोक क्षेत्रमा भएको आगलागीमा ४५ घर जलेर नष्ट हुँदा १२९ परिवार विस्थापित भएका थिए। 

२०६९ माघ २६ गते शेर्पाटोलमा आगलागीबाट आठ घर जलेर नष्ट हुँदा १८ परिवार विस्थापित भएको तथ्यांक छ। 

२०७० कात्तिक १८ टुक्रेबजार क्षेत्रमा आगलागीबाट पाँच घर नष्ट हुँदा १७ परिवार विस्थापित भएका थिए।

त्यसैगरी २०७१ चैत ९ गते फुङलिङ–४ तोक्मेडाँडा क्षेत्रमा आगलागी हुँदा ३७ घर जलेर नष्ट भएका थिए। 

उक्त घटनामा १४५ परिवार विस्थापित भएका थिए। 

२०७७ वैशाख १९ गते पुरानो बैंक लाइन, ट्याक्सी काउन्टर क्षेत्रमा आगलागीबाट सात घर नष्ट हुँदा २९ परिवार विस्थापित भएका थिए । 

त्यसैगरी मंगलबार ताप्लेजुङको दोस्रो ठूलो बजार दोभानमा आगलागीबाट ४९ घर नष्ट भएका छन्।  ५५ परिवार विस्थापित हुन पुगेको ताप्लेजुङ जिल्लाको तथ्यांकमा छ। रासस