रियलको जितमा मेन्डी बने नायक

काठमाडौं – फरल्यान्ड मेन्डीले च्याम्पियन्स लिगमा पहिलो गोल गरेसँगै स्पेनिस क्लब रियल मड्रिडले एटलान्टामाथि साँघुरो जित निकालेको छ।

च्याम्पियन्स लिग, अन्तिम १६ को खेलअन्तर्गत एटलान्टाको घरेलु मैदानमा सम्पन्न खेलमा पाहुना टिम रियलले घरेलु टिमविरुद्ध १–० गोलको जित निकालेको हो।

८६ औं मिनेटमा लुका मोड्रिचको पासमा मेन्डीले गोल गर्नुअघि सुगठिन एटलान्टाको टिमसँग रियल साविकभन्दा फितलो देखिएको थियो।

इतिहासमै पहिलोपटक भिडेका यी दुई टिममा पहिलो खेलमै जित निकालेर आफूलाई सावित गर्ने दाउमा थिए। तर, सो अवसर खेलको अन्तिममा रियलले पायो।

यता खेलको १७ औं मिनेटमा रियलका मेन्डीलाई गोल गर्ने अवस्थामा फाउल गरेपछि एटलान्टाका रेमो फ्रेउलर रातो कार्ड खाँदै मैदानबाट बाहिरिएका थिए।

१० खेलाडीमा सीमित टिमले रियलको पोस्टमा कुनै प्रहार गर्न सकेनन्। अब उसले १६ मार्चमा हुने खेलमा जित निकाल्न सके क्वार्टरफाइनलको लागि ढोका खुल्न सक्नेछ।

दोस्रो लेगको खेल रियलको मैदानमा हुनेछ।