अदालतको आदेशबाट छुट्नेबित्तिकै पक्राउ परे बास्तोला

काठमाडौं– सर्वोच्च अदालतले सरकारद्वारा प्रतिबन्धित नेत्रविक्रम चन्द ‘विप्लव’ नेतृत्वको नेकपाका नेता धर्मेन्द्र बास्तोलालाई रिहा गर्न आदेश दिएलगत्तै प्रहरीले पुनः पक्राउ गरेको छ।

रिहा भएलगत्तै बाहिरिने क्रममा प्रहरीको टोलीले बल प्रयोग गरेर बास्तोलाई नियन्त्रणमा लिएको हो। 

न्यायाधीशद्वय मीरा खड्का र सुष्मालता माथेमाको संयुक्त इजलासले वास्तोलालाई थुनामुक्त गर्न आदेश दिएको हो। 

बास्तोलाको तर्फबाट अनिमा बास्तोलाले बन्दी प्रत्यक्षीकरण रिट दायर गरेकी थिइन्।

यसअघि नै अदालतले छाड्न आदेश गरे पनि पुनः पक्राउ गरेर महानगरीय प्रहरी वृत्त, सिंहदबारमा राखिएको थियो।

‘निवेदकलाई थुनामा राख्दा बाध्यात्मक रुपमा पालना गर्नुपर्ने कानुन कार्यविधि पालना नगरी म्याद थप माग गर्दा र दिँदा के कुन प्रयोजनको लागि म्याद थप गरिएको हो भन्नेसम्म पनि उल्लेख नगरी केवल फरक विचार र आस्था राखेको कारण पक्राउ गरेको देखिँदा निजलाई थुनामा राख्ने कार्य न्यायिक दृष्टिकोणबाट उचित नदेखिएकोले यी निवेदक धर्मेन्द्र बास्तोलालाई आजै गैरकानूनी थुनाबाट मुक्त गरिदिनु भनी बन्दी प्रत्यक्षीकरणको आदेश जारी गरिएको छ,’ सर्वोच्चको आदेशमा भनिएको छ।