बारपाकमा एकै घरका ३ जना मृत भेटिए 

पोखरा– गोरखाको बारपाकस्थित एक घरमा ३ जना मृत फेला परेका छन्। 

बारपाक सुलिकोट–१ को बारपाकमा एउटै घरभित्र एक जना पुरुष र दुई जना महिला मृत फेला परेको जिल्ला प्रहरी कार्यालय गोरखाका प्रमुख एसपी सुरेन्द्रबहादुर गुरुङले बताए। 

मृत्यु हुनेमा ८४ वर्षीय दिलबहादुर गुरुङ, २२ वर्षीया आइतकुमारी गुरुङ र १३ वर्षीया उषा गुरुङ छन्। दिलबहादुर र आइतकुमारी ससुरा बुहारी हुन्। उषा नजिकको आफन्त रहेको स्थानीयलाई उद्धृत गर्दै प्रहरीले जनाएको छ।  

मुखबाट फिँजसहितको गाज आएकाले विषाक्त खानाका कारण घटना भएको प्रहरीको अनुमान छ। 

सोमबार बिहान अबेरसम्म पनि घरको ढोका नखुलेपछि स्थानीय घरभित्र पसेर हेर्दा तीनैजना मृतावस्थामा भेटिएका थिए। 

घटनाको बारेमा थप अनुसन्धानका लागि प्रहरी चौकी जौबारीबाट थप फोर्स बारपाक गएको एसपी गुरुङले बताए। 

घरका अरु सदस्य चितवनस्थित आफन्तको मृत्यु संस्कारका सहभागी हुन गएका बेला घटना भएको स्थानीयले बताएका छन्।