कोरोना खोपबारे श्वेतपत्र जारी गर्न कांग्रेसको माग

काठमाडौं- नेपाली कांग्रेसले कोभिड–१९ विरुद्धको खोप लगाउन स्पष्ट खाकासहितको श्वेतपत्र सार्वजनिक गर्न सरकारसँग माग गरेको छ।

कोभिड–१९ विरुद्धको खोप लगाउने विषयमा सरकार गम्भिर नभएको भन्दै कांग्रेसले सबै जनतालाई खोप सुनिश्चित गरी कार्ययोजनासहितको श्वेतपत्र सार्वजनिक गर्न माग गरेको हो। कांग्रेसका सहमहामन्त्री प्रकाशशरण महतले स्पष्ट खाकासहितको विस्तृत कार्ययोजना सार्वजनिक गर्न सरकारसँग माग गरे।

खोप खरिद गर्नुपर्ने खण्डमा खरिद प्रक्रिया पारदर्शी हुनुपर्ने र त्यसको विश्वसनियताको विषयमा जनतालाई सुनिश्चित गर्न जरुरी रहेको पनि उनले बताए। 

खोप लगाउने विषयमा सरकार गम्भिर नभएको पनि सहमहामन्त्री महतले बताए। भारतले १० लाख खोप निःशुल्क दिएको र सो खोप दिन थालिए पनि पारदर्शी कार्ययोजना आउन नसकेको महतको भनाइ छ। 

सबैभन्दा पहिला अग्रपंक्तिमा काम गर्नेलाई प्राथमिकतामा राखेर खोप दिने कुरा ठिक भए पनि ज्येष्ठ नागरिकलाई कसरी खोप दिने भन्ने कुराको कार्ययोजना ल्याउन नसकेको उनले बताए। निःशुल्क खोप कहाँबाट आउँदैछ र रकम तिरेर ल्याउने कार्ययोजना के छ भन्ने विषयलाई सरकारले स्पष्ट पार्नुपर्ने पनि सहमहामन्त्री महतले बताए।