समायोजनका लागि कागजात पुर्‍याएर आवेदन दिन स्वास्थ्य मन्त्रालयको आग्रह 

काठमाडौ – स्वास्थ्य तथा जनसंख्या मन्त्रालयले स्वास्थ्य क्षेत्रका कर्मचारीलाई समायोजनका लागि तोकिएको ढाँचाको निवेदन र सहमति पत्रसहित आवश्यक कागजात पुर्‍याएर आवेदन दिन आग्रह गरेको छ।

इच्छुक कर्मचारीलाई तोकिएको ढाँचाको दोहोरोसहमति पत्रसहित स्वास्थ्य सेवाका कर्मचारीहरुको समायोजन मिलानसम्बन्धी व्यवस्थाहरु २०७७ बमोजिम कागजात पेश गर्न मन्त्रालयले आग्रह गरको हो।

मन्त्रालयलले यही फागुन १ गतेदेखि १६ गतेसम्म समायोजनका लागि अनलाइन आवेदन माग गरेको छ। हालसम्म प्राप्त आवेदनमा कागजातहरु नपुगको तथा अन्य त्रुटिहरु भेटिएकाले स्वास्थ्य सेवाका कर्मचारीहरुको समायोजन मिलानसम्बन्धी व्यवस्थाहरु २०७७ अध्ययन गरेर मात्रै आवेदन भर्न अनुरोध गरेको छ। 

स्वास्थ्य सेवामा कार्यरत कर्मचारीको समायोजन प्रक्रिया चलिरहेको समयमा विश्वभर कोभिड-१९ महामारी आएपछि सरकारले स्वास्थ्य सेवाका कर्मचारीको हकमा जो जहाँ छ त्यहीँ बसेर काम गर्ने निर्णय गरेको थियो। जसका कारण स्वास्थ्य समायोजन पूर्ण हुन पाएको थिएन।

कतिपयको समायोजन निर्णय भएत पनि पत्र लिइसकेका थिएनन् भने कतिपय दरबन्दी नभएका ठाउँमा बढी समायोजन भएका थिए। यी सबै समायोजनलाई मिलान गर्नका लागि सरकारले समायोजन मिलान प्रक्रिया सुरु गरेको हो।