शिक्षक हत्याको आरोपमा विप्लव र प्रकाण्डसहित ४२ जनाविरुद्ध मुद्दा दायर, पक्राउ भने एक जनामात्रै

काठमाडौं– शिक्षक राजेन्द्र श्रेष्ठ हत्याको आरोपमा नेकपा विप्लव समूहका ४२ जना नेता–कार्यकर्ताविरुद्ध जिल्ला अदालत मोरङमा कर्तव्य ज्यान मुद्दा दर्ता भएको छ।

मिक्लाजुङ गाउँपालिकाको सरस्वती आधारभूत विद्यालयका प्रधानाध्यापक ५३ वर्षिय राजेन्द्र श्रेष्ठको गत मंसिर २३ गते अपहरणपछि हत्या गरेको आरोपमा कर्तव्य ज्यान मुद्दा दर्ता गरिएको हो। सुराकी गरेको आरोपमा श्रेष्ठलाई विप्लव समूहका ६ जना कार्यकर्ताले घरबाट अपहरण गरी जंगलमा लगेर हत्या गरेका थिए।

घटनाको अनुसन्धानपछि प्रहरीले विप्लव समूहका महासचिव नेत्रविक्रम चन्द ‘विप्लव’ र प्रवक्ता खड्गप्रसाद विश्वकर्मा ‘प्रकाण्ड’सहित ४२ जनालाई मुद्दा चलाउनुपर्ने प्रतिवेदन बुझाएको थियो। त्यसकै आधारमा जिल्ला सरकारी वकिलको कार्यालयले सोमबार मुद्दा दायर गरेको हो। 

मुद्दामा मंगलबारबाट थुनछेक बहस हुने जिल्ला सरकारी वकिलको कार्यालयले जनाएको छ। अहिलेसम्म हत्याका आरोपीमध्ये विप्लव समूहका मोरङ इन्चार्ज डिवि सिलवाल भनिने धनबहादुर विक एकजनालाई मात्रै प्रहरीले पक्राउ गरेको छ। पक्राउ परेका विकले पनि हत्यामा संलग्न नभएको बताउँदै आएका छन्।