कुवेत लैजाने भन्दै श्रीलंका लगेर अलपत्र पारेकाे आरोपमा एकजना पक्राउ

पर्वत - वैदेशिक रोजगारीको सिलसिलामा कुवेत लैजाने भन्दै श्रीलंका लगेर एक महिलालाई अलपत्र पारेकाे आराेपमा सुवेदी कान्छो भनिने खेमबहादुर सुवेदीलाई प्रहरीको मानव बेचबिखन अनुसन्धान ब्यूरोले पक्राउ गरेको छ।

बर्दिया जिल्लाको बढैयाताल गाउँपालिका–३ घर भएका सुवेदी पुर्ख्यौली घर पर्वतको कुश्मा नगरपालिका-२, खुर्कोट नयाँपुलबाट सोमबार पक्राउ परेका हुन्।

सुवेदीले कुवेतमा घरेलु कामदारका रूपमा लैजाने भन्दै काठमाडौंबाट नेपालगञ्ज हुँदै भारतको नयाँदिल्ली पुर्‍याएर त्यहाँबाट चेन्नई हुँदै श्रीलंका पुर्‍याएपछि एक महिला अलपत्र परेकी थिइन्। 

श्रीलंका पुर्‍याएपछि त्यहाँ सिरक खान र आलिक खानले आफ्नो साथमा राखेर घरबाट बाहिरसमेत जान नदिई थुनामा राखेको अवस्थामा श्रीलंकाली प्रहरीले पक्राउ गरेको थियो। 

ती महिला श्रीलंकाको जेलमा रहेको थाहा पाएपछि कोलम्बोस्थित नेपाली दूतावासको सहयोगमा उनलाई नेपाल फर्काइएको ब्यूरोले जनाएको छ।

महिलालाई गएको माघ ३० गते नेपाल फर्काइएको थियो। ती महिलाको जाहेरीका आधारमा सुवेदीलाई पक्राउ गरी कारबाही अगाडि बढाएको ब्यूरोले जनाएको छ। रासस