नक्कली बिल बनाउने कारखानै चलेको रहेछ : प्रधानमन्त्री ओली

काठमाडौं– प्रधानमन्त्री केपी शर्मा ओलीले झुटो बिलबिजक बनाउने कारखाना नै चलेको बताएका छन्। 

सोमबार सिंहदरबारमा ३ वर्षको उपलब्धि सुनाउँदै ओलीले झुटो नक्कली बिजक बनाउने कारखाना नै चलेको बताएका हुन्। 

‘राजस्व चुहावटको कसुरका २१५ मुद्दामा राष्ट्रसेवक कर्मचारीसहित ७५५ जनाविरुद्ध ३२ अर्ब ७९ करोड ९० लाख बिगो असुल गरी जरिवना र कैद सजाय माग गरी मुद्दा चलाइएको छ,’ उनले भने, ‘झुटा नक्कली बिजक बनाउने त कारखानै चलेको रहेछ।’

पछिल्लो समय राजस्व अनुसन्धान विभागले झुटा बिलबिजक बनाई राजस्व छली गर्नेविरुद्ध राजस्व छलीको मुद्दा दायर गर्दै आएको छ।

भूकम्पपछि पुनर्निर्माण गरिएको सिंहदरबारस्थित प्रधानमन्त्री कार्यालयबाट आफ्नो कार्यकालको ३ वर्षे उपलब्धि सुनाउँदै ओलीले त्यस्तो बताएका हुन्।

प्रधानमन्त्री ओलीले विदेशी विनिमय अपचलन तथा अवैध हुण्डी कारोबारको कसुरमा ४४० जनाविरुद्ध १० अर्ब ७२ करोड ६९ लाख विगो कायम गरी त्यसको तेब्बर जरिवाना र ३ वर्ष कैद सजाय माग गरिएको बताए।