ओलीतिर लागेका हुन् तिलोत्तमाका मेयर ?

बुटवल– रुपन्देहीको तिलोत्तमा नगरपालिकाका प्रमुख वासुदेव घिमिरेले नेकपा ओली समूहका महासचिव विष्णु पौडेललाई साथ दिने भएका छन्। 

दाहाल–नेपाल समूहमा खुलेर लागेका घिमिरे र उपप्रमुख चौधरीले ओली समूहका महासचिव विष्णु पौडेलसँगको छलफलमा ओलीलाई साथ दिने प्रतिबद्धता जनाएका हुन्। 

अर्थमन्त्रीसमेत रहेका पौडेलले सामाजिक सञ्जालमा ‘साथै छौं, साथै रहनेछौं’ लेखेर तस्बिर सार्वजनिक गरेका छन्। तिलोत्तमा नगरपालिकाका प्रमुखसहित अधिकांश कार्यपालिका सदस्य ओली समूहमा लागेको बताइएको छ।

नेकपा दाहाल–नेपाल समूहका नेता घनश्याम भुसालका निकट तथा नगरका प्रमुख घिमिरे ओली समूहमा खुलेपछि रुपन्देहीको राजनीति परिवर्तन हुने देखिएको छ। भेलाका लागि बुटवल आएका महासचिव पौडेललाई बिदाइ गर्न प्रमुख घिमिरे तथा उपप्रमुख चौधरी भैरहवास्थित गौतमबुद्ध अन्तर्राष्ट्रिय विमानस्थल पुगेका थिए। 

दाहाल–नेपाल समूहको कार्यकर्ता भेला तथा विरोध प्रदर्शनको समेत अगुवाइ गरेका नगरप्रमुख घिमिरे ओली समूहमा लागेको बारे आधिकारिक रुपमा भने केही बताएका छैनन्।