७ महिनाको विकास खर्च १८ प्रतिशत

काठमाडौं- चालू आर्थिक वर्षको ७ महिनामा पूँजीगत खर्च करिब १८ प्रतिशत खर्च भएको छ। महालेखा नियन्त्रक कार्यालयका अनुसार साउनदेखि फागुन १ गतेसम्म १७.८६ प्रतिशत खर्च भएको हो।

कार्यालयका अनुसार फागुन १ गतेसम्म ६ अर्ब ३० करोड ३९ लाख १० हजार रुपैयाँ खर्च भएको छ। चालू आर्थिक वर्षमा सरकारले पूँजीगततर्फ ३ खर्ब ५२ अर्ब  ९१ करोड ७५ लाख रुपैयाँ बजेट विनियोजन गरेको थियो।

महालेखा नियन्त्रक कार्यालयका अनुसार कुल चालूगत र वित्तीय व्यवस्था तर्फको बजेटसमेत गरेर ३३.८७ प्रतिशत खर्च भएको छ।

१४ खर्ब ७४ अर्ब ६४ करोड ५४ लाख रुपैयाँ कुल बजेट विनियोजन गरेको सरकारले शनिबारसम्म ४ खर्ब ९९ अर्ब ५० करोड ४१ लाख रुपैयाँ खर्च गरेको छ। चालूतर्फ ७ महिनामा ४२.८७ प्रतिशत र वित्तीय व्यवस्थातर्फ १७.१७ प्रतिशत खर्च भएको महालेखाले जानकारी दिएको छ।

यो वर्ष चालूतर्फको बजेट ९ खर्ब ४८ अर्ब ९४ करोड ६  लाख रुपैयाँ रहेको थियो। त्यस्तै वित्तीय व्यवस्थातर्फ १ खर्ब ७२ अर्ब ७८ करोड ७३ लाख रुपैयाँ बजेट विनियोजन गरिएको थियो।

सरकारले लक्ष्यअनुसार बजेट खर्च गर्न नसकेपछि अर्धवार्षिक समीक्षामार्फत बजेटको आकार घटाइसकेको छ। अर्थ मन्त्रालयले अर्धवार्षिक समीक्षामार्फत बजेटको आकार घटाउँदै सुरुको बजेटको ९१ प्रतिशत मात्रै चालू आर्थिक वर्षमा खर्च गरिने जानकारी यसअघि नै गराइसकेको छ।

चालू आर्थिक वर्षको ७ महिनामा सरकारले ४९.२८ प्रतिशत राजस्व संकलन गरेको छ। कुल १० खर्ब ११ अर्ब ७५ करोड ८४ लाख रुपैयाँ राजस्व संकलन गर्ने लक्ष्य लिएकोमा शनिबारसम्म ४ खर्ब ९८ अर्ब ५५ करोड १५ लाख रुपैयाँ राजस्व संकलन गरिएको छ।