संसद विघटन गरेर ओलीले सहमतिमाथि विश्वास घात गरे : पौडेल

काठमाडौं- नेपाली कांग्रेसका वरिष्ठ नेता रामचन्द्र पौडेलले प्रधानमन्त्री केपी शर्मा ओलीले संसद विघटन गरेर हिजो भएको सहमतिमाथि विश्वास घात गरेको आरोप लगाएका छन्।

जसपा संघीय परिषद्का अध्यक्ष एवम् पूर्व प्रधानमन्त्री डा.बाबुराम भट्टराईको ‘गुमनाम आमाहरुको कथा’ नामक पुस्तक लोकापर्ण कार्यक्रममा बोल्दै उनले यस्तो बताएका हुन्।

‘राष्ट्रिय आत्मविश्वासको संकट भयो। यति ठूलो विश्वास घात भयो। संघर्ष गरेर संविधान लोकतन्त्र ल्याऔं’, उनले भने, ‘संविधान बनाउँदा बसेर छलफल गर्‍यौँ। ६ वर्ष लगाएर संविधान बनाइयो। ओलीजी पनि बसेर बनाएको आज सहमति तोड्ने काम भयो।’

केपी ओलीले जनताको मतमाथि विश्वास घात गरेको भन्दै अहिलेको परिस्थितिलाई कसरी अगाडि बढाउने भन्ने ठूलो चुनौती रहेको पौडेलले बताए।

‘एउटा अपराधलाई ढाक्न अर्को ठूलो अपराध गर्ने प्रवृति देशमा बढेको छ। सोच्ने विचार गर्ने चिन्तन गर्नेतर्फ नाफा नोक्सानीको हिसाबले मात्रै चल्न भएन। भावनात्मक पक्ष पनि हेर्नुपर्‍यो,’ उनले भने।