अमेरिकाले म्यानमारका सेनालाई भन्यो- अहिलेको कदम फिर्ता नलिए आवश्यक कदम चाल्छौं

काठमाडौं - अमेरिकाले म्यानमारकी स्टेट काउन्सिलर आङ सान सु कीलगायतका नेताहरूलाई त्यहाँकाे सेनाले नियन्त्रणमा लिएको घटनाको विरोध जनाएको छ।

राष्ट्रपति कार्यालय ह्वाइटहाउसका प्रवक्ता जेन साकीले विज्ञप्ति जारी गर्दै प्रजातन्त्रलाई कमजोर पार्न गरिएको गिरफ्तारी भन्दै विरोध जनाएको हो। 

साकीका अनुसार अमेरिकी राष्ट्रपति जो बाइडेनलाई म्यानमारको अवस्थाबारे राष्ट्रिय सुरक्षा सल्लाहकार जेक सुलिभानले ब्रिफिङ गरेका थिए। 

म्यानमारका लोकतान्त्रिक संस्थाहरूलाई आफ्नो बलियो समर्थन रहेको जनाउँदै अमेरिकाले नियन्त्रणमा लिइएका नेताहरूलाई रिहा गर्न पनि भनेको छ। साथै अमेरिकाले त्यहाँको सेना र अन्य दलहरूलाई लोकतान्त्रिम मापदण्ड र कानुनी शासनको पालना गर्न पनि आग्रह गरेको छ। 

म्यानमारको परिस्थितिलाई नजिकबाट नियालिरहेकाे भन्दै अमेरिकाले भनेको छ, ‘अहिलेको कदम फिर्ता नलिए आवश्यक कदम चाल्छौं।’

म्यानमारमा सेनाले सत्ता कब्जा गर्दै एक वर्षसम्म संकटकाल लागू गरेको छ।