मस्तिष्काघातबाट बेलायतमा कोरोना संक्रमित डा लक्सम्बाको निधन

लण्डन– कोरोना सङ्क्रमणका कारण अस्पताल भर्ना भएका एक नेपालीको उपचारकै क्रममा मस्तिष्काघातबाट मृत्यु भएको छ। 

ताप्लेजुङ जिल्ला सिकैँचामा स्थायी घर भई लामो समयसम्म बेलायतमा रहँदै आएका प्राज्ञिक व्यक्तित्व तथा भूपू गोर्खा सैनिक प्रा डा चन्द्र लक्सम्बाको बेलायतको फार्नबरोस्थित फ्रिम्ली अस्पतालमा निधन भएको उनका सहकर्मी डा कृष्ण अधिकारीले जानकारी दिए।

कोरोना सङ्क्रमण भई माघ ५ गतेदेखि अस्पतालमा उपचार गराइरहेको अवस्थामा मस्तिष्काघात भएपछि उनको भेन्टिलेटरमा राखेर उपचार भइरहेको थियो। उच्च रक्तस्राब भएका कारण शल्यक्रिया गर्न नसकिने र बचाउने अन्य कुनै उपाय नरहेपछि अस्पतालले परिवारलाई भेट्न बोलाएको थियो। 

परिवारका अन्य सदस्यहरूलाई समेत कोरोना देखिएका कारण अस्पताल भर्नापछि परिवारका कसैलाई पनि अस्पताल प्रशासनले भेट्न अनुमति दिएको थिएन।

गोर्खा सैनिकबाट अवकास भएपछि करिब दुई वर्ष अक्सफोर्ड विश्वविद्यालयमा अनुसन्धान सहायकका रूपमा काम गरेका ५९ वर्षीय लक्सम्बाले सन् २००६ देखि २००९ सम्म नेपाल अध्ययन केन्द्र, युकेले गरेको बेलायतमा बस्ने नेपालीहरुको गणना परियोजनाको संयोजकका रूपमा काम गरेका थिए। 

पछिल्लो समय बेलायतको स्थायी बसाइ टुङ्ग्याएर नेपालमा खुला विश्वविद्यालयमा प्राध्यापकका रूपमा रहेका उनी केही समयअघि मात्र श्रीमती र छोराबुहारीलाई भेट्न बेलायत आउका थिए। 

स्वर्गीय लक्सम्बाका श्रीमती र दुई छोरा छन्।