प्रदेश १ मा आइपुग्यो साढे ९ हजार भायल कोभिड खोप

विराटनगर– प्रदेश १ मा कोभिड–१९ विरुद्धको करिब १० हजार भायल खोप आइपुगेको छ । 

स्वास्थ्य तथा जनसंख्या मन्त्रालय स्वास्थ्य सेवा विभागले पहिलो चरणमा पठाएको ९ हजार ६०० भायल प्राप्त गरिएको प्रदेश स्वास्थ्य आपूर्ति व्यवस्थापन केन्द्र विराटनगरका प्रशासकीय अधिकृत काशीराज पराजुलीले बताए। 

उनका अनुसार केन्द्रमा प्रदेश १ का १४ र प्रदेश २ का सिरहा र सप्तरी जिल्लाका लागि पनि खोप आएको हो। सुनसरी र मोरङले सोमबार नै खोप बुझिसकेको र अन्य जिल्लामा मंगलबार बिहान पठाइने प्रशासकीय अधिकृत पराजुलीले बताए। 

प्रदेश १ का १४ जिल्लाका सरकारी तथा निजी अस्पतालका स्वास्थ्यकर्मी र कर्मचारी, महिला स्वास्थ्य स्वयंसेविका गरी ३४ हजार ८५१ जना र १४ वटै जिल्लाका ७२५ सरसफाइ कर्मचारी गरी ३५ हजार ५७६ जनालाई कोभिड १९ विरुद्धको खोप लगाइँदै छ। 

प्रदेश १ का सरकारी तथा निजी अस्पतालका स्वास्थ्यकर्मी र कर्मचारीहरुमा ताप्लेजुङका १४ हजार ३, धनकुटाका ८३१, उदयपुरका १ हजार २३७, भोजपुरका १ हजार १७६, मोरङका १२ हजार ५६, इलामका १ हजार ६९०, ओखलढुंगाका १ हजार ३६६, खोटाङका १ हजार ६००, झापाका ४ हजार ९ सय ७७, तेह्रथुमका ७२३, संखुवासभाका ९४९, सोलुका ६८६, सुनसरीका ५ हजार २३३ र पाँचथरमा ९२४ लाई खोप लगाइने पराजुलीले बताए।