चितवनमा एचआईभी सङ्क्रमितका परिवारकाे निःशुल्क स्वास्थ्य बीमा

चितवन - चितवनका ३४८ एचआईभी सङ्क्रमितका परिवारकाे निःशुल्क स्वास्थ्य बीमा गरिएको छ। यहाँ रहेका स्थानीय तहसँगको समन्वयमा उनीहरूको स्वास्थ्य बीमा गरिएको हो।

एड्स हेल्थ फाउण्डेशनको सक्रियतामा उनीहरूको परिवारको स्वास्थ्य बीमा गरिएको हो। 

फाउण्डेशन चितवनका प्रमुख कृष्णहरि सापकोटाका अनुसार बीमा गर्नेमा सबैभन्दा धेरै भरतपुर महानगरपालिकाका सङ्क्रमित रहेका छन्।

स्थानीय तहहरूले नीति तथा कार्यक्रममा राखेर उनीहरूको बीमा गरेका हुन्।

सङ्क्रमित खुलेर आउने वातावरण बनाउनका लागि निःशुल्क स्वास्थ्य बीमा कार्यक्रम सञ्चालन गरिएको उनले जानकारी दिए। 

बीमा गरिएका परिवारमा एकभन्दा बढीसमेत सङ्क्रमित रहेको सापकोटाले बताए। 

जिल्लामा अहिले एक हजार ९२६ सङ्क्रमित छन्, तीमध्ये १४७ बालबालिका हुन्। 

फाउण्डेशनमा दर्ता भएर औषधि सेवन गर्नेमा ४७ बालबालिका, ४७१ महिला र ४५१ पुरुषसहित ९६७ छन्। 

सन् २०२० मा गरिएको परीक्षणका क्रममा नयाँ ७९ जनामा सङ्क्रमण भेटिएको छ। थपिएका व्यक्तिमध्ये चार बच्चा छन्।

आठ हजार ७६२ जनाको परीक्षणका क्रममा सो सङ्ख्यामा सङ्क्रमित थपिएको फाउण्डेशनका स्रोत व्यक्ति डा. युवानिधि बसौलाले जानकारी दिए।

बसौलाका अनुसार सन् २०२० मा सङ्क्रमितमध्ये १५ को मृत्यु भएको छ। मृत्यु हुनेमा एक कोरोना सङ्क्रमण, चार क्यान्सर, पाँच क्षयरोग र अन्य अत्यधिक मदिरा सेवनका कारण छन्। रासस