झिल्टुङ क्रसकन्ट्री रेसमा सुमन र हुमी विजयी

नुवाकोट– नुवाकोटको बेलकोटगढी नगरपालिकामा सम्पन्न पाँचौ झिल्टुङ क्रसकन्ट्री रेस  अन्तर्गत पुरुषतर्फ सुमन कुलुङ राई र महिलातर्फ हुमी बुढामगर विजयी भएका छन्।

शनिबार सम्पन्न दौडमा राईले निर्धारित १३.४ किमी दुरी ५४ मिनेट ५५ सकेन्डमा पार गर्दै विजयी भएका हुन्। उनले श्रीकास राईलाई एक मिनेट तीन सेकेन्डले पछि पार्दैै उपाधि जिते।

तेस्रो भएका राजेन्द्र तामाङ राईभन्दा ३४ सेकेन्डले पछि परे।

त्यस्तै सोही विधाको महिलातर्फको उपाधि भने हुमी बुढामगरले जितेकी छन्। उनले एक घण्टा १३ मिनेट २३ सेकेन्डमा सो दुरी पार गदै उपाधि जितेकी हुन्।

महिलातर्फ बन्दना राई दोस्रो भइन्। भने आशा राउत तेस्रो भइन्। प्रतियोगितामा पहिलो, दोस्रो र तेस्रो हुनेले क्रमशः १५ हजार, १० हजार र पाँच हजार पुरस्कार पाएका छन्।

सो प्रतियोगितामा अन्य विधामा पनि खेलहरू भएका थिए। साढे चार किमीतर्फ छात्र खुल्लामा विश्वरा कुँवर प्रथम भए भने सोही विधाको महिलातर्फ सरस्वति बोहराले उपाधि जितिन्।

१६ वर्ष मुनिको खेल अन्तर्गत छात्र तर्फ दिनेश नेपाल पहिलो भए भने छात्रातर्फ दिपशिखा राई पहिलो भइन्।

प्रतियोगितामा गत वर्षबाट सुरु गरिएको आमा समूहको खेल यो वर्ष पनि समावेश गरिएको थियो।

नुवाकोटको बेलकोटगढीमा पछिल्लो पाँच वर्षदेखि लगातार क्रस कन्ट्री प्रतियोगिता हुँदै आइरहेको प्रतियोगिताका संस्थापक मोहन नेपाल बताउँछन्। उनले आउँदो पाँच वर्षमा यो प्रतियोगितालाई अन्तराष्ट्रिय स्तरमा पुर्याउने दाबी गरे।