बेञ्जेमा चम्किँदा रियलको जित

काठमाडौं– दुई घरेलु कपका खेलमा हार बेहोर्दै बाहिरिएको क्लब रियल मड्रिडले गएराति ला–लिगामा जित निकालेको छ।

अलाभेसको मैदानमा सम्पन्न खेलमा उसले ४–१ गोलको फराकिलो जित निकालेको हो। रियलको जितका लागि फरवार्ड करिम बेञ्जेमाले दोहोरो गोल गरे भने इडेन हजार्ड र कासिमेरोले समान १–१ गोल गरे।

खेलको १५ औं मिनेटमा गोल गर्दै कासिमेरोले रियललाई सुरुवाति अग्रता दिलाएका थिए। त्यस्तै, ४१ औंं मिनेटमा बेञ्जेमाले अग्रतालाई दोब्बर बनाए।

रियलकै इडेन हजार्डले इन्ज्युरी समयमा गोल गरेपछि भने पहिलो हाफमा पाहुना टिम ३–० गोलले अघि रह्यो।पहिलो हाफ तीन गोलले अघि रहेको रियलले दोस्रो हाफमा एक गोल थप्यो। त्यसअघि खेलको ५९ औं मिनेटमा अलाभेसका जोसेलुले गोल गरेर घरेलु टिमलाई लयमा फर्काउन खोजे पनि पर्काउन सकेनन्।

खेलको ७० औं मिनेटमा बेञ्जेमाले व्यक्तिगत दोस्रो गोल गर्दै खेललाई ४–१ गोलअन्तरमा पुर्‍याए। सोही नतिजाका साथ सम्पन्न खेलमा रियलले लगातार तीन जितविहीन यात्रापछि लिगमा जित निकालेको छ।

ऊ जितसहित दोस्रो स्थानमा छ। जहाँ शीर्षस्थानको एट्लेटिको मड्रिडभन्दा चार अंकले पछि छ। यता पराजित अलाभेस रेलिगेसन जोभन्दा एक अंक र एक स्थान माथि छ।