सावित्राको ह्याट्रिकमा एपीएफको सानदार जित

काठमाडौं– राष्ट्रिय फुटबल टिमकी स्ट्राइकर सावित्रा भण्डारीको ह्याट्रिकमा  एपीएफ क्लबले चन्द्रपुर नगरपालिकाविरुद्ध सानदार जित निकालेको छ।

राष्ट्रिय महिला लिग अन्तर्गत आज बिहीबार सातदोबाटोस्थित एन्फा कम्प्लेक्समा सम्पन्न खेलमा एपीएफले ६–० गोलको फराकिलो जित निकालेको हो।

खेलको १४ औं, ६२ औं र ७२ औं मिनेटमा गोल गर्दै सावित्राले ह्याट्रिक पूरा गरिन्। त्यस्तै, एपीएफको सानदार जितमा कप्तान अनिता बस्नेत, अन्जली योन्जन र प्रिति राईले १–१ गोल गरे।

खेलको १४ औं मिनेटमा गोल गर्दै सावित्राले एपीएफलाई सुरुआती अग्रता दिलाइन्। त्यस्तै, योन्जनले २२ औं मिनेटमा गोल गर्दै अग्रतालाई दोब्बर बनाएकी थिइन्।

योन्जनको गोलसँगै पहिलो हाफमा एपीएफ दुई गोलले अघि रह्यो। तर दोस्रो हाफमा उसले चार गोल थप्यो।

सावित्राबाहेक ७० औं मिनेटमा मैदान छिरेकी प्रिती राईले ८९ औं मिनेटमा गोल गरिन् भने त्यसअघि बस्नेतले ६४ औं मिनेटमा गोल गरिन्।

लिगमा पहिलो जितसँगै एपीएफले तीन अंक जोडेको छ। हिजो सम्पन्न खेलमा नेपाल पुलिस क्लब र त्रिभुवन आर्मी क्लबले गोलरहित बराबरी खेलेका थिए।

त्यस्तै, आज नै सम्पन्न अर्को खेलमा विराटनगर र वालिङ नगरले १–१ गोलको बराबरी खेलेका छन्।