चेल्सी पुनः ओरालो लाग्दै, लेस्टर शीर्षस्थानमा

काठमाडौं– इंग्लिस प्रिमियर लिग(ईपीएल)मा उपाधि दावेदारको रुपमा लिइएको चेल्सी मंगलबार राति लेस्टर सिटीसँग पराजित भएको छ।
लेस्टर सिटीको मैदानमा सम्पन्न खेलमा चेल्सीले घरेलु टिमसँग २–० गोलको हार बेहोरेको हो।

उक्त हारसँगै चेल्सीले अंकतालिकामा ओरालो यात्रा कायम राखेको छ। लिगमा छैटौं हारसँगै अहिले ऊ अंकतालिकाको आठौं स्थानमा छ।
यता चेल्सीलाई हराउँदै लेस्टर सिटी ईपीएलको शीर्षस्थानमा उक्लिएको छ। १९ खेलबाट ३८ अंक जोड्दै लेस्टर शीर्षस्थानमा पुगेको हो।

यता दोस्रो स्थानको म्यानचेस्टर युनाइटेडले एक खेल कम खेल्दै ३७ अंक जोड्दा दुई खेल कम खेलेको म्यानचेस्टर सिटीको ३५ अंक छ।
उपाधि दावेदार लिभरपुल भने युनाटेडसँगको बराबरीपश्चात् ३४ अंकका साथ चौथो स्थानमा छ।

मंगलबार राति जितका क्रममा चेल्सीलाई हराउन लेस्टरका विल्फ्रेड एनडीडी र जेम्स मड्रिसनले पहिलो हाफमा गोल गरे।

एनडीडीले खेलको छैटौं मिनेटमै गोल गरेर सुरुवाति अग्रता दिलाए भने मड्रिसनले ४१ औं मिनेटमा गोल गर्दै अग्रतालाई दोब्बर बनाए।

तर दोस्रो हाफमा गोल नभएपछि खेल लेस्टरको पक्षमा पर्यो। लेस्टरको जितसँगै ऊ शीर्षस्थानमा पुगे पनि सुरक्षित हुने अवस्था भने छैन्।

यता चेल्सीको प्रशिक्षक प्रांक लाम्पार्ड गएरातिको हारसँगै थप दबाबमा परेका छन्। उनी समर विन्डोमा गरेको दुईसय मिलियन यूरो खर्चको उपलब्धि देखाउन असमर्थ छन्।

उनले गत समर विन्डोमा केही हेविवेट खेलाडी अनुबन्ध गरेका थिए। तर उनीहरुले अपेक्षा गरेअनुसारको खेल्न सकेका छैनन्।