वैशाखमा पोखरा स्पोर्टस् अवार्ड

पोखरा - नेपाल खेलकुद पत्रकार मञ्च, गण्डकीले आगामी वैशाखमा पाँचौं पोखरा स्पोर्टस् अवार्ड गर्ने निर्णय गरेको छ।

कोभिड-१९ का कारण स्थगित सो अवार्ड वैशाखमा विश्व प्रेस स्वतन्त्रता दिवसका दिन ‘टीभीएस अपाचे पाँचौं पोखरा स्पोर्टस् अवार्ड–२०७६/०७७’ नाममा गर्ने निर्णय मञ्चको सोमबारको बैठकले गरेको हो।

मञ्च अध्यक्ष एकराज गिरीको मूल संयोजकत्वमा यसअघि १०१ सदस्यीय मूल आयोजक समिति, विभिन्न उपसमिति, खेलाडी मनोनयन समिति र पत्रकारतर्फ प्रतिभा छनोट समिति गठन गरिएको थियो।

खेलाडी मनोनयन रामकृष्ण ज्ञवाली, केशव पाठक, दीननाथ बराल, सन्देश श्रेष्ठ र सुदर्शन रञ्जित सदस्य रहेको छनोट समिति गठित छ। वर्ष उत्कृष्ट पत्रकारिता अवार्डमा दीपेन्द्र श्रेष्ठ, त्रिभुवन पौडेल, विनोद लामिछाने सहित पदेनसदस्यमा मञ्च अध्यक्ष र महासचिव छन्।

बतास ब्रदर्शको मुख्य प्रायोजनमा हुँदै आएको सो कार्यक्रममा लाइफ टाइम अचिभमेन्ट अवार्ड, वर्ष खेलाडी पुरुष, वर्ष खेलाडी महिला, वर्ष चर्चित खेलाडी, वर्ष उदीयमान खेलाडी, वर्ष उत्कृष्ट प्रशिक्षक, वर्ष उत्कृष्ट खेल संघ र वर्ष उत्कृष्ट पत्रकारिता अवार्डलगायत ८ विधामा अवार्ड दिइने छ।