एन्फा ललितपुर जिल्ला अध्यक्ष थापाको निलम्बन फुकुवा

काठमाडौं- भाइबरको ग्रुप च्याटका कारण निम्बनमा परेका अखिल नेपाल फुटबल संघ (एन्फा) को ललितपुर जिल्ला अध्यक्ष पुरुषोत्तम थापाको निलम्बन फुकुवा भएको छ।

आज बसेको एन्फाको केन्द्रीय कार्यसमितिको बैठकले उनको निलम्बन फुकुवा गर्ने निर्णय गरेको हो।

एन्फाले गत जेठ ५ गते विधानविपरित काम गरेको भन्दै साधारणसभा सम्मका लागि थापालाई निलम्बन गरेको थियो।

उनले वैशाश २२ गते मनाइने एन्फा दिवसका दिन भाइबरमा उत्तेजक अभिव्यक्ति दिएपछि एन्फामा विवादले उत्कर्ष रुप लिएको थियो।

सो घटनापछि एन्फाले थापालाई किन निलम्बन नगर्ने भन्ने प्रश्नमा पनि उनले प्रतिप्रश्न गर्दै एन्फालाई नै आफूलाई विधानविपरित भएको प्रमाण दिन चुनौति दिँदै प्रश्नले भरिएको जवाफ पठाएका थिए।

उनलाई एन्फाले कारबाही गरेपछि ललितपुर जिल्ला संघले अध्यक्षको कारबाही फिर्ता लिन माग गरे पनि एन्फाले फिर्ता लिएको थिएन।

एन्फाले साधारणसभाको एक दिनअघि थापाको निलम्बन फुकुवा गरेको हो।

एन्फाको बैठकले राष्ट्रिय टोली तयारी समितिका संयोजक मधुसुधन उपाध्यायले प्रस्तुत गरेको खेलाडीको आचारसंहिता पनि साधारण सभाबाट पारित गर्ने निर्णय गरेको छ।

भोलिको साधारणसभामा एन्फाको विधान संशोधन मस्यौदा समितिले तयार पारेको प्रस्ताव पनि पेश गरिने भएको छ।