उपाधि उचाल्नबाट चुक्यो बार्सिलोना, मेस्सीलाई रातो कार्ड

काठमाडौं – सुपरकोपा डी स्पानाको फाइनलमा क्याटलोनियन टिम बार्सिलोना पराजित भएको छ।

बार्सिलोनाको दुई गोलका विरुद्ध एथ्लेटिक क्लबले तीन गोल गरेपछि बार्सिलोनाले सुपरकोपाको उपाधि गुमाएको हो।

बार्सिलोनाका लागि दुवै गोल एन्टोनी ग्रिजम्यानले गरे। उनले खेलको ४० औं मिनेटमा गोल गरेर बार्सिलोनालाई अग्रता दिए पनि एथ्लेटिकका ओस्कार डी मार्कोसले ४२ औं मिनेटमा गोल गर्दै बराबरी गरे।

त्यस्तै ग्रिजम्यानले नै ७७ औं मिनेटमा बनाएको अग्रता एथ्लेटिकका अइसर विलैब्रेले अन्तिम मिनेटमा तोडे।

दोस्रोपटक पनि बराबरी भएपछि खेलमा अतिरिक्त ३० मिनेट थप गरिएको थियो। अतिरिक्त समयको तेस्रो मिनेटमा इनाकी विलिमयम्सले गोल गर्दै एथ्लेटिकका क्लबलाई जित दिलाए।

तर, अतिरिक्त समयको अन्तिम मिनेटमा बार्सिलोनाका कप्तान लियोनेल मेस्सीले एथ्लेटिकका विलैब्रेलेमाथि प्रहार गरेर मैदानमा लडाएको भीएआरबाट प्रमाणित भएपछि उनले रातो कार्ड पाए।

मेस्सीले बार्सिलोनाको करिअरमा पहिलोपटक रातो कार्ड पाएका हुन्। उनले बार्सिलोनाबाट ७५३ खेल खेलेका छन्।

यसअघि मेस्सीले अर्जेन्टिनाबाट खेल्दा दुईपटक रातो कार्ड पाएका थिए। २००५ को हंगेरिविरुद्ध डेब्यू खेलमा र २०१९ को कोपा अमेरिकामा। यसबाहेक उनको मैदान यात्रा सफा थियो।

साथै अब उनी घरेलु प्रतियोगिताका केही खेलका लागि प्रतिबन्धमा पर्न सक्ने छन्।