दोस्रो डिभिजन क्लबसँग पराजित हुँदै बायर्न जर्मन कपबाट बाहिरियो

काठमाडौं– बुन्डेसलिगा, च्याम्प्यिन्स लिग र जर्मन कप जितेको साविक ट्रिबल विजेता बायर्न म्युनिक दोस्रो डिभिजनको क्लब होल्स्टेनसँग पराजित भएको छ। 

जर्मन कप अन्तर्गत बुधबार राति सम्पन्न खेलमा बराबरीका साथ टाईब्रेकरमा पुगेको खेलमा बायर्न पराजित भएको हो।

बायर्न दोस्रा डिभिजनको  टिमसँग १६ वर्षयता पहिलोपटक पराजित भएको हो। त्यस्तै १२ वर्षसम्म लगातार सेमिफाइनलसम्मको यात्रा गरेको टीम यो सिजनमा दोस्रो राउण्डबाटै बाहिरिएको हो।  

यो हारसँगै बायर्नले जर्मन कपको यात्रा बिचमै पूर्णविराम लगाएको छ। खेलको निर्धारित र अतिरिक्त समयमा दुवै टिमले २–२ गोल अन्तर भएपछि खेल बराबरी भएको थियो।

नाटकीय खेलको १४ औं मिनेटमा बायर्नका सर्ज गन्याब्रीले गोल गरे भने ३७ औं मिनेटमा होल्स्टेनका फिन बार्टेल्सले गोल गर्दै खेललाई बराबरीमा ल्याए।

त्यस्तै दोस्रो हाफको ४७ औं मिनेटमा बायर्न लिरोय सनाले गोल गरेर पुनः अग्रता बनाए पनि होल्स्टेनका हाउके वाहीले इन्ज्युरी समयमा गोल गर्दै बराबरी गरे।

बराबरीपछि थपिएको अतिरिक्त समयमा पनि गोल हुन नसक्दा खेल टाईब्रेकरमा पुगेको थियो। 

टाईब्रेकरमा होल्स्टेनका गोलकिपरले छैटौं गोल रोकेपछि बायर्न पराजित भयो। यसअघिका सबै अवसर गोलमा परिणत भएका थिए। 
जित निकाल्दै होल्स्टेन अर्को चरणमा पुगेको छ भने बायर्न बाहिरिएको छ।