कुस्तीको प्रशिक्षण पुनः सुरु हुँदै

काठमाडौं। बन्द भएको १० महिनापछि कुस्तीको प्रशिक्षण पुनः सुरु हुने भएको छ।

कोरोना भाइरसको महामारीका कारण गत वर्ष चैतदेखि बन्द रहेको कुस्तीका राष्ट्रिय खेलाडीको प्रशिक्षण आगामी माघको पहिलो सातादेखि पुनः आरम्भ हुन लागेको हो। 

महामारीका कारण कुस्तीका खेलाडी अभ्यास गर्न नपाउँदा निष्क्रिय भएर बसेका छन्। कुस्ती खेलको गतिविधि बढाउन खेलाडीको प्रशिक्षण सुरु गर्न लागिएको नेपाल कुस्ती संघका महासचिव विद्यासागर पोखरेलले जानकारी दिए। 

‘कुस्तीमा सामाजिक दूरी कायम गर्न सहज नहुँदा अन्य खेलको भन्दा प्रशिक्षण ढिला सुरु हुन लागेको हो’, उनले भने। 
स्वास्थ्य सुरक्षाको मापदण्ड अपनाएर नै खेलाडीलाई प्रशिक्षण दिइने पोखरेलले बताए। 

कुस्तीमा नेपालले १३औं दक्षिण एशियाली खेलकुद (साग)मा महिलातर्फ एउटा मात्र स्वर्ण पदक जितेको थियो।

नेपालका लागि सो पदक संगीता धामीले जितेकी थिइन्। रासस