सन्दीप आबद्ध होबर्ट हुरिकेन्सको बीबीएलमा तेस्रो हार

काठमाडौं– नेपाली राष्ट्रिय टिमका लेग स्पिनर सन्दीप लामिछाने आबद्ध टिम होबर्ट हुरिकेन्सले बिग ब्यास लिग (बीबीएल) मा तेस्रो हार बेहोरेको छ।

सोमबार सम्पन्न खेलमा होबर्टले मेलबर्न स्टार्ससँग १० रनले पराजित भएको हो। 

टस हारेर ब्याटिङको निम्तो पाएको मेलबर्नले पूरा ओभर खेल्दै ६ विकेटको क्षतिमा १८३ रन बनाएको थियो। 

१८४ रनको लक्ष्यका साथ मैदान छिरेको होबर्ट पूरा ‌ओभरमा ६ विकेट गुमाएर १७३ रनमा समेटिएपछि खेल मेलबर्नले जितेको हो।

मेलबर्नको जितका लागि मार्कस स्टोइनिसले अविजित ९७ रनको योगदान दिए। हिल्टन कर्थराइट र निकोलस पुरनले क्रमशः ३६ र २६ रन बनाए।

होबर्टका लागि नाथन इलिस, रिलेय मेरेडिथ र सन्दीप लामिछानेले  क्रमशः ३, २ र १ विकेट लिए।

जवाफी ब्याटिङमा आएको होबर्टका बेन म्यागर्मोट्टले ९१ रन बनाए पनि टिमलाई जित दिलाउन सकेनन्। उनलाई साथ दिँदै डेबिड मलन र कप्तान पिटर हेन्डस्कम्बले २६ र २१ रन बनाए।

मेलबर्नका राम रेनबर्डले दुई विकेट लिए भने बली स्टइनेक, एडम जम्पा र लियम हट्चरले समान १-१ विकेट लिए।

प्रतियोगितामा तेस्रो जितसहित मेलबर्नले १५ अंक बनाएको छ भने पराजित होबर्ट १८ अंकका साथ तेस्रो स्थानमा छ। 

होबर्ट शीर्षस्थानको सिड्नी सिक्सर्स भन्दा तीन अंकले पछि छ भने मेलबर्न ६ अंकले पछि छ।

सन्दीपले जारी सिजनको दुई खेलमा सहभागी भएर तीन विकेट हात पारेका छन्।