होटेलमा खाना खान गएका भारतीय खेलाडीको कोरोना नेगेटिभ

काठमाडौं- नयाँ वर्षमा खाना खान होटेल गएको भिडियो भाइरल भएपछि आइसोलेसनमा बसेका भारतीय खेलाडीसहित सबै क्रिकेटरको कोरोना रिपोर्ट नेभगेटिभ आएको छ।

हिजो जनवरी ३ मा गरिएको परीक्षणमा भारत र अष्ट्रेलियाका खेलाडीको रिपोर्ट नेगेटिभ रहेको पाइएको हो।

‘खेलाडी र भारतीय टिमका सहयोगी स्टाफहरुको कोभिड–१९ परीक्षण जनवरी ३ मा गरिएको थियो। सबै खेलाडी र स्टाफको रिपोर्ट नेगेटिभ आएको छ,’ इन्डियन क्रिकेट कन्ट्रोल बोर्ड (बीसीसीआई) ले भनेको छ।

अंग्रेजी पात्रोअनुसार नयाँ वर्षको दिन भारतीय टिमका उपकप्तान रोहित शर्मासहित पाँच खेलाडी आइसोलेसनमा बस्नुपर्ने भएको थियो।

एक भारतीय समर्थकको ट्वीटर ह्यान्डलबाट बाहिरिएको भिडियोमा नयाँ वर्षको दिन पाँच खेलाडी मेलबर्नको एक रेस्टुरेन्टमा खाना खाँदै गरेको देखिन्छ।

भिडियोमा देखिएका शर्मासहित ऋषभ पन्त, शुभमन गिल, पृथ्वी स र नवदीप शैनीलाई आइसोलेसनमा राखिएको छ। तर उनीहरु छुट्टै समूह बनाएर खेल अभ्यासमा सहभागी भइरहेका छन्।

यता क्रिकेट अष्ट्रेलियाले बीसीसीआईसँग समन्वय गरेर खेलाडीको कदमले बायोसेक्योरेटी तोडेको हो वा होइन भन्ने निणर्य गर्ने बताएको छ।

अब भारतले अष्ट्रेलियाविरुद्ध जनवरी ७ बाट तेस्रो टेस्ट सुरु गर्नेछ।